नेपालमा कोभिड–१९ विरुद्धको खोप अभियान धमाधम सञ्चालन भइरहँदा ५ देखि ११ वर्ष उमेर समूहका बालबालिकाले अझै लगाउन पाएका छैनन् । यद्यपि त्यो समूहका बालबालिकालाई खोप प्रदान गर्ने घोषणा भने सरकारले गरिसकेको छ । बालबालिकालाई फाइजर खोप दिनका लागि खरिद सम्झौताको तयारी भइरहेको स्वास्थ्य विभाग महाशाखाअन्तर्गतको आपूर्ति शाखाले जनाएको छ । स्वास्थ्य तथा जनसङ्ख्या मन्त्रालयका अनुसार यो उमेर समूहका बालबालिकाका लागि ८४ लाख मात्रा खोप आवश्यक पर्छ ।
सरकारले जेठ मसान्तसम्ममा ५ देखि ११ वर्ष उमेर समूहका बालबालिका कोरोनाविरुद्धको खोप दिइने स्वास्थ्य मन्त्रालयका अधिकारीहरूले दोहोर्याउँदै आए पनि खरिद प्रक्रियाका लागि सम्झौताको तयारी भने भर्खर हुँदैछ । व्यवस्थापन महाशाखाका निर्देशक डा. रुद्र मरासिनीले बालबालिकाका लागि फाइजर खोप सम्झौता प्रक्रिया चलिरहेको बताए ।
यस्तै १२ देखि १७ वर्ष उमेर समूहका ३४ लाख ५ हजार ४५५ जना बालबालिकामध्ये ८८ प्रतिशतले पहिलो मात्रा खोप लगाइसकेका छन् भने ६५ प्रतिशतले पूर्ण मात्रा खोप लगाइसकेको स्वास्थ्य मन्त्रालयले जनाएको छ ।
