काठमाडौं महानगरपालिकाले संस्थागत विद्यालयमा पढ्ने विद्यार्थीलाई छात्रवृत्ति प्रदान गर्न छनोट प्रक्रिया शुरु गरेको छ ।
महानगरपालिकाको शिक्षा शाखाले सूचना निकालेर कक्षा ११ मा अध्ययन गर्ने विद्यार्थीका लागि छात्रवृत्ति प्रदान गर्न प्रकृयागत तयारी थालेको जनाएको छ । ११ मा पढ्ने विद्यार्थीलाई छात्रवृत्तिका लागि यही असार २८ गतेदेखि आवेदन खुला गरिएको छ । आवेदन साउन १२ गतेसम्म अनलाइनबाटै भर्न सकिनेछ ।
आवेदन दिएका छात्रछात्राको परीक्षा साउन २० गते हुनेछ । परीक्षामा कक्षा १० को पाठ्यक्रममा आधारित एक सय वटा बहुवैकल्पिक वस्तुगत प्रश्न हुनेछन् । विद्यालयगत छात्रवृत्तिको कोटा र परीक्षा केन्द्रसम्बन्धी अन्य विवरण पछि सार्वजनिक गर्ने महानगरको शिक्षा विभागले जनाएको छ ।
