सरकारले अमेरिकी सहायता परियोजना एमसीसी संसदमा टेबल गराउन खोजेपछि त्यसको विरोधमा भएको प्रदर्शनका कारण नयाँ बानेश्वर तनावग्रस्त बनेको छ । एमसीसीको विरोधमा उत्रिएका प्रदर्शनकारी र प्रहरीबीच झडप हुँदा केही प्रहरी तथा प्रदर्शनकारीहरू घाइते भएका छन् ।
सत्तारुढ दलमै विवाद रहेको एमसीसीको विरुद्धमा सत्तागठबन्धनकै दल माओवादी केन्द्र र एकीकृत समाजवादीका कार्यकर्ताले बुधबार नयाँ बानेश्वरमा प्रदर्शन गरेका हुन् । त्यस्तै, राप्रपाका कार्यकर्ताहरू पनि प्रदर्शनमा उत्रिएका छन् ।
प्रदर्शनकारीहरू प्रहरीको सुरक्षा घेरा कटेर संघीय संसद भवनअगाडिको गेटसम्म पुगेका थिए । स्थितिलाई नियन्त्रणमा लिन प्रहरीले पानीका फोहरा र अश्रु ग्यास प्रहार गरेको छ ।
त्यस्तै, प्रदर्शनकारीहरूले पनि प्रहरीमाथि ढुंगा प्रहार गरेका छन् ।
प्रदर्शनकारीहरू माइतीघरदेखि नाराजुलुससहित नयाँ बानेश्वरसम्म पुगेका थिए । प्रहरीले प्रदर्शनकारीलाई संघीय संसद भवनभन्दा करिब ३ सय मिटर पश्चिममा रोकेको थियो । यद्यपि प्रदर्शनकारीहरूले सुरक्षा घेरा तोडेर निषेधित क्षेत्रमा जान खोजेपछि प्रहरीले बल प्रयोग गरेको थियो ।
