आजदेखि काठमाडौं महानगरपालिकाले आफ्नो क्षेत्रभित्र भारतीय चलचित्र प्रदर्शन निषेध गरेको छ। कामनपाका मेयर बालेन शाहले यसबारे आइतबारै जानकारी दिइसकेको छन्। आइतबार सामाजिक सञ्जालमा लेख्दै मेयर शाहले सोमबारदेखि भारतीय चलचित्रको प्रदर्शन रोक्ने बताएका हुन्।
उनले चलचित्र आदिपुरुषमा समावेश भएको जानकी भारतीय छोरी हुन् भन्ने आपत्तिजनक सन्देश हटाउन ३ दिनको समय दिएको र उक्त ३ दिनमा नहटाएको भन्दै भारतीय चलचित्रको प्रदर्शन रोक्ने बताएका हुन्।
उनले लेखेका छन्,काठमाडौँ महानगरपालिका क्षेत्रभित्र उक्त राष्ट्रहित विपरितको चलचित्रको प्रदर्शनलाई निषेध गरेर मात्र देशभित्रका अन्य क्षेत्र र विदेशमा सो चलचित्र प्रदर्शन हुन दिने हो भने त्यसले भ्रामक तथ्य स्थापित गर्ने भएकोले उक्त चलचित्रबाट आपत्तिजनक अंश नहटाएसम्म काठमाडौ महानगरमा कुनै पनि भारतीय चलचित्र प्रदर्शन गर्न भोलि देखि निषेध गरिएको छ।
बालेनको यस घोषणापछि सञ्चार तथा सूचना प्रविधि मन्त्रालयले पनि पहिलोपटक औपचारिक प्रतिक्रिया दिएको छ। आइतबार वक्तव्य जारी गर्दै सेन्सर पास भइसकेको फिल्मलाई लिएर सञ्चारमाध्यम र सरोकारवाला निकायबाट जनाइएका आपत्तिको विषयमा गम्भीर ध्यानाकर्षण भएको जनाएको छ ।तर चलचित्रलाइ चल्न दिने नदिनेसम्बन्धमा मन्त्रालयले केही बोलेको छैन। विज्ञप्तिमा जानकीलाई भारतीय चेली रुपमा प्रस्तुत भएको संवाद हटाउन लगाई सेन्सर पासको प्रमाणपत्र दिएर सार्वजनिक प्रदर्शन गर्न अनुमति दिइएको उल्लेख छ।
