बैंकर्स संघले इन्धन उपयोगका कारण बढ्दो पेट्रोलियम पदार्थको आयातलाई घटाउन कार्य दिन घटाउनुपर्ने सुझाव दिएको छ।
संघले कार्य दिन पाँच दिनमा झार्नुपर्ने प्रस्ताव गरेको छ। संघले सोमबारदेखि शुक्रबारसम्म पुरै समय काम गर्नुपर्ने, शनिबार र आइतबार बिदा दिनुपर्ने प्रस्ताव गरेको हो।
संघका प्रमुख कार्यकारी अधिकृत अनिल शर्माले संसदको अर्थसमितिका साथै अर्थमन्त्रालयलाई कार्य दिन घटाउन प्रस्ताव गरेका हुन्।
संघका अनुसार, बिदाका दिन निजी सवारी बाहिर निकाल्न नपाइने, आवश्यक परे प्रयोजन खुलाएर मात्र निकाल्न पाइने व्यवस्था गरिनु पर्छ। यसो गर्दा इन्धन खपत घटेर आयात कम हुन्छ। यसले गर्दा इन्धन खरिदका लागि बाहिरिने विदेशी मुद्रा कम हुन्छ र विदेशी मुद्राको सञ्चिति बढ्न जान्छ।
नेपालले भारतबाट पेट्रोलियम पदार्थको आयात गर्छ। माघ मसान्तसम्म एक खर्ब ५५ अर्ब ७३ करोड रुपैयाँको पेट्रोलियम पदार्थको आयात भइसकेको छ। पोहोरको माघसम्म जम्मा ८० अर्ब ४४ करोडको मात्र आयात भएको थियो।
इन्धनको भाउ विदेशी बजारमा नै महँगिएका कारण उत्तिकै परिमाणमा ल्याउँदा पनि बढी विदेशी मुद्रा भुक्तानी गरिरहनु परेको छ। त्यसैले संकटका बेला इन्धनको खपत घटाउने उपायतर्फ लाग्नु पर्ने संघको धारणा छ।
संघले पठाओ र टुटलले जस्तो निजी क्षेत्रको सवारी साधन प्रयोग गर्न ‘कार पुलिङ’ को व्यवस्था गर्न पनि सुझाएको छ। ‘यसो गर्दा एउटा कारण एक/दुई जना मात्र हिँड्दैनन्,’ शर्माले भने, ‘पाँच जना चढे भने पनि त्यसले सहयोग पुग्छ।’
