बुटवल। राजमार्गअन्तर्गत बुटवलमा निर्माणधीन सडकको काम चाँडै सक्न व्यवसायीहरुले माग गरेका छन्। विस्तार कार्यमा ढिलाइ हुँदा दुर्घटना बढ्नुका साथै व्यापारमा समस्या भएको भन्दै व्यवसायीहरुले निर्माण कार्य यथाशक्य सक्न सडक डिभिजन कार्यालयलाई आग्रह गरेका हुन्।
बुटवल उद्योग वाणिज्य संघको टोलीले बिहीबार सडक डिभिजन कार्यालय बुटवल पुगेर सडक भत्काएर अहिले अवस्था लथालिङ्ग भएकाले आसपासको व्यापार खस्किएको गुनासो गर्दै चाँडै काम गर्न आग्रह गरेका छन्।
डेलिगेसनमा गएको टोलीले राजमार्ग चौराहा–गोलपार्क व्यापारिक सडक विस्तारको काममा ढिलाइ हुँदा त्यस आसपासका व्यापार व्यवसाय प्रभावित भएको भन्दै सडक विस्तारलाई गति दिन माग गरेको छ ।
संघका अध्यक्ष उज्ज्वल कसजुले धुलो तथा हिलोले सडक आसपासको व्यवसाय घटेको बताउँदै निर्माण कम्पनीलाई छिटो सडक सक्न दबाब दिन आग्रह गरे । काम नरोकियोस् र समयमै सकियोस् भनेर निर्माण व्यवसायीलाई माग र आवश्यकताअनुसार बजेट विनियोजन गरेको सडक डिभिजन कार्यालय बुटवलका प्रमुख जयलाल मरासिनीले बताए ।
चार लेनको सडकलाई ६ लेनको बनाउन भन्दै २०७३ सालदेखि निर्माण प्रक्रियामा लगिएको थियो । बेलहिया बुटवल व्यापारिक मार्ग आयोजनाले २०७३ चैतमा कंचनजंगा बिरुवा जेवीलाई ३० महिनामा सक्ने गरी ठेक्का दिएको थियो ।
घर भत्काउनेबारे विवाद झिकेर स्थानीयहरू अदालत गएपछि ४ वर्ष निर्माणको काम ठप्प भयो । एक वर्षयता अदालती झन्झट साम्य भए पनि सडक निर्माणले गति लिन सकेको छैन ।
