काठमाडौं । एसियन गेम्सका लागि चीन जाने नेपाली क्रिकेट टोलीलाई बिदाइ गरिएको छ ।
नेपाल क्रिकेट संघ (क्यान)का पदाधिकारीहरूले आइतबार एक कार्यक्रमबीच खेलाडीहरूलाई बिदाइ गरेका हुन् ।
नेपालले यही असोज १० मा मंगोलिया र असोज १४ मा माल्दिभ्ससँग खेल्नेछ ।
” हामीले राम्रो अभ्यास गरेका छौँ । हामी सबैको लक्ष्य मेडल जित्ने छ । त्यसको लागि सम्पूर्ण खेलाडीहरू तयार छौँ । आउने दिनमा एकदमै राम्रो गर्नेछौँ ।” सोधिएको तैयारीको प्रश्नमा नेपाली राष्ट्रिय क्रीकेट टोलीका कप्तान रोहित कुमार पौडेलले बताए।
खेलाडीहरूलाई बिदाइ गर्दै नेपाल क्रिकेट संघ (CAN) का अध्यक्ष चतुरबहादुर चन्दले आगामी दिनमा सबैले देख्नेगरी, मनोबल कमजोर नहुनेगरी आफूहरू लाग्ने बताए ।
उनले नयाँ कार्यसमितिले खेलाडीको हौसला बढाउने गरी काम गर्ने प्रतिवद्धता जनाए । नेपालले एसियाडमा हुने क्रिकेटमा मेडल जित्ने उच्च सम्भावना रहेको बताए ।
नेपालले यो हुन गैरहेको समूह चरण पार गरेपछि भारत, पाकिस्तान, श्रीलंका वा बंगलादेशमध्यका देशहरुसङ्ग प्रतिष्पर्धा गर्न पाउने छ।
“पहिलाको भन्दा उत्कृष्ट रूपमा यो कार्य समितिले यहाँहरूको भावनाको कदर गर्दै आगामी दिनमा देखिने गरी मनोबल कमजोर नहुनेगरी हामी हौसला बढाउने छौँ । एसियाडको अग्रिम शुभकामना छ । हामी मेडलका लागि उच्च मनोबलका साथ खेल्नेछौँ । यसमा सम्भवना छ । नेपालको शिर उच्च हुनेगरी खेलिरहनुभएको छ । ” चन्दले थपे।
कार्यक्रममा बोल्दै क्यानका सचिव पारस खड्काले नेपाली क्रिकेटको नयाँ युगको सुरुवात गर्ने प्रयासमा आफूहरू रहेको बताए ।
