नायक पल शाह फिल्म ‘मायावी’मा अनुबन्धित भएका छन् । पल निर्देशक दिवाकर भट्टराईले निर्देशन गर्ने नयाँ फिल्म ‘मायावी’ पल मुख्य नायकका रुपमा प्रस्तुत हुन लागेका हुन् ।
नायक पल शाह डेढ वर्षपछि दिवाकरको फिल्म मार्फत कमव्याक गर्न लागेका हुन् । उनले अभिनय गरेको फिल्म म यस्तो गीत गाउँछु २ पछिल्लो पटक प्रदर्शनमा आएको थियो । एक वर्ष कारागारमा बिताएका पल अहिले म्युजिक भिडियो मोडलिंग र विभिन्न मेला महोत्सवमा व्यस्त छन् । निर्देशक दिवाकरले फिल्ममा पललाई प्रमुख अभिनेताका रुपमा भित्र्याइएको बताए ।
फिल्ममा भट्टराई स्वयंको कथा रहनेछ । फिल्ममा यसअघि नै अभिनेत्री दीपिका प्रसाई नायिकाका रुपमा फाइनल भइसकेकी छन् । फिल्म ‘ऐश्वर्या’ पछि दिवाकर र दीपिकाको यो दोस्रो सहकार्य हो ।
क्रिएटिभ सिने आर्टसले निर्माण गर्न लागेको फिल्ममा एसडी योगीको संगीत, राम अविरल विष्टको गीत, राजुविक्रम थापाको डिओपी रहनेछ । फिल्मको छायाँकन असोज २ गतेबाट पोखरादेखि सुरु हुनेछ ।
