रुकुम पश्चिम — मुसीकोट नगरपालिका–१ स्थित त्रिभुवन जनता माविमा कक्षा ५ मा अध्ययनरत नवीन केसी विद्यालय गइरहेका छन् । तर किताबबिनै विद्यालय जाने र आउने गरेका छन् । ‘किताब छैन कसरी पढ्नु ?’ केसीले भने । किताब नआएका कारण विद्यालयले पनि केही दिन सकेको छैन ।
बाँफिकोट गाउँपालिका–५, को आधारभूत विद्यालय बडगाउँकी रेखा घर्ती पनि किताबबिनै विद्यालय गइरहेकी छन् । विद्यालयले किताब नआएको बताएको छ । ‘केही कापी लिएर विद्यालय जाने र आउने मात्रै भइरहेको छ,’ घर्तीले भनिन्, ‘किताब नै नभएपछि सरहरूले पनि पढाउन थाल्नुभएको छैन ।’
मुसीकोटका नवीन र बाँफिकोटकी रेखा मात्रै होइन जिल्लाका कुनै पनि विद्यालयमा पाठ्यपुस्तक पुगेको छैन । पुस्तकबिना पठनपाठन सुरु हुन सकिरहेको छैन । समयमै पाठ्यपुस्तक नपुग्दा विद्यार्थी मात्रै होइन शिक्षकलाई समेत असजिलो भएको छ । त्रिभुवन जनता माविका प्रध्यानाध्यापक हरिप्रसाद खनालले विद्यालयमा पाठ्यपुस्तक नपुग्दा समस्या भएको बताए ।
कोर्स फेरिएकाले विद्यार्थीसित किताब नभई पठनपाठन गर्न गाह्रो परिरहेको उनले बताए । जनक शिक्षा सामग्री केन्द्रसम्म सम्पर्क गर्दा पनि किताब नपाइएको एक जना व्यवसायी विराज गौतमले बताए । विद्यालयहरूले कुनै पनि कक्षाका पूरै किताब नआएको बताएका छन् । ‘केही किताब छन्, सबै किताब छैनन्, पठनपाठनलाई गति दिन समस्या छ,’ बाल कल्याण मावि आठबीसकोटका प्रअ केशव हमालले भने ।
चौरजहारी नगरपालिकाका शिक्षा, युवा तथा खेलकुद शाखा प्रमुख शेरप्रसाद ढकालले सबै विद्यालयमा पाठ्यपुस्तक नपुगेको बताए । किताब ल्याउन व्यवसायीको कम ध्यान पुगेको र छपाइमा पनि ढिला हुँदा समस्या भएको सुनाए । किताब ल्याउन व्यवसायीलाई ताकेता गरिएको ढकालले बताए । कोर्स फेरिएको हकमा बाहेक पुराना किताबको सहायताले पठन पाठन थालिएको उनले बताए । कोर्ष फेरिएपछि वेबसाइटमा राखिएको पाठ्यपुस्तकका आधारमा सहजीकरण गर्न भनिएको ढकालले जनाए । शिक्षा विकास तथा समन्वय इकाइले पनि पाठ्यपुस्तक पुर्याउन ताकेता गरिरहेको छ ।
