आगामी मंसिर ४ मा तय गरिएको संघीय तथा प्रदेश निर्वाचन अन्र्तगत काठमाडौं क्षेत्र नम्बर-३ को प्रदेश ‘क’ मा नेपाली काँग्रेसको तर्फबाट जनप्रिय उम्मेदवार कुमारराज सुवेदीको नाम सिफारिश गरिएको छ । पछिल्लो समय सुवेदीको पक्षमा निकै राम्रो माहौल देखिएसँगै पार्टीको महाधिवेशन प्रतिनिधि समेत रहेका उनको नाम प्रदेश तथा क्षेत्रीय कार्य समितिले सिफारिश गरेको हो ।
एक अपील जारी गरी सुवेदीले प्रदेश तथा क्षेत्रीय कार्य समितिलाई धन्यवाद दिँदै पार्टीका सबै सम्बन्धित निकायहरूबाट आफूलाई साथ सहयोग प्राप्त हुने विश्वास लिएका छन् । लामो राजनीतिक इतिहास र गतिलो सामाजिक पृष्ठभूमि भएका सुवेदीको नाम सिफारिस भएसँगै स्थानीय कार्यकर्ता तथा मतदाता निकै उत्साहित देखिएका छन् । २०२७ साल बैशाख १८ गते जोरपाटीमा जन्मिएका बहुआयामिक व्यक्तित्वका धनी सुवेदीले त्रिभुवन विश्वविद्यालयबाट व्यवस्थापनमा स्नातक तहसम्म अध्ययन गरेका छन् ।
सुवेदीले नेपाली काँग्रेसमा आबद्ध रही तीन दशकभन्दा अघिदेखि राष्ट्रियता, लोकतन्त्र, समाजवाद र मानवअधिकारका लागि निरन्तर आवाज बुलन्द बनाउँदै आएका छन् । हालै सम्पन्न स्थानीय निर्वाचनमा उनले पार्टी उपसभापति पूर्णबहादुर खड्काको संयोजकत्वमा रहेको स्थानीय तह निर्वाचन केन्द्रीय परिचालन समिति अन्र्तगतको ‘काठमाडौं उपत्यका स्थानीय तह आन्तरिक सूचना एवं समन्वय उपसमिति’ मा सदस्य रही अत्यन्त जिम्मेवारीपूर्वक आफ्नो भूमिका निर्वाह गरेका थिए ।
उनीसँग पार्टीको अनुसन्धान, नीति तथा प्रशिक्षण प्रतिष्ठानमा आबद्ध रही कार्य गरेको अनुभव पनि छ । कुमारराज सुवेदी नेपाली काँग्रेस काठमाडौको निर्वाचनमा सचिवका उम्मेदवार रहेका थिए । राजनीति बाहेक विश्वको सबैभन्दा ठूलो समाजिक संस्था लायन्स क्लब इन्टरनेशनलसँगको आबद्धता र मानव अधिकार आन्दोलन मार्फत सामाजिक सेवाको क्षेत्रमा सुवेदी चिरपरिचित व्यक्तित्व हुन् ।
लायन्स क्लब इन्टरनेशनल डिष्ट्रिक ३२५ ए १ को गभर्नर रहिसकेका सुवेदीले २०४८ सालमै एमनेष्टी इन्टरनेशनल जस्तो प्रतिष्ठित संस्थाको काठमाडौं इष्टग्रुप ३५ को संयोजक भई उत्कृष्ट ढंगले कार्य सम्पादन गरे । त्यसैले मानव अधिकार र लायन्स अभियानको क्षेत्रमा समग्र काठमाडौं उत्तरपूर्वी क्षेत्रमा उनलाई ‘रोल मोडल’ को रुपमा पनि लिइन्छ । मानव अधिकार तथा शान्ति समाजका केन्द्रीय महासचिव समेत रहिसक्नु भएका सुवेदी धेरै सामाजिक संघ संस्थामा आबद्ध रहेका छन् ।
