नेपालमा कोरोनाको तेस्रो लहर चल्दै छ । यति बेला कोरोनाका प्रजातिमध्येको ओमिक्रोन भाइरसको फैलावट तीव्र गतिमा बढ्दै गएको छ । फैलावट तीव्र गतिमा भएमा पनि संक्रमितको शरीरमा भने दुई–तीन दिन मात्र रहने विज्ञहरूले बताइरहेका छन् । दैनिक १० हजारभन्दा माथि फेला परेको संक्रमितको संख्या पछिल्लो केही दिनदेखि संक्रमण घट्दै गइरहेको स्वास्थ्य मन्त्रालयको तथ्याङ्कले देखाउँछ ।
मुलुक यतिबेला स्मार्ट लकडाउनमा छ, शिक्षण संस्था बन्द छन्, सार्वजनिक स्थलमा २५ जनाभन्दा बढी भेला नहुन सरकारको निर्देशन छ, सवारी साधनमा जोरबिजोर प्रणाली लागू भएको छ भने खोप कार्डलाई अनिवार्य गरेको छ । त्यस्तै मेला–महोत्सव गर्न रोक लागाइएको छ । स्वास्थ्य मापदण्ड पालना गर्नुपर्ने कायमै छ । कोरोनाविरुद्धको खोप लगाउन सरकारले अभियान चलाइरहेको छ । तर, सरकारले लगाएका नियमको परिपालना भए÷नभएको अनुगमन भने फितलो छ, जसको प्रभावकारिता नै छैन ।
यता कोरोना संक्रमितको संख्या पनि दिनप्रतिदिन थपिँदै गएको छ । कोरोना भाइरसकै कारण विगतमा पटक–पटक मुलुकमा लकडाउन गर्नुपर्ने अवस्था सिर्जना भयो । त्यो अवस्था नदोहोरिएला भन्न सकिँदैन । संक्रमितको संख्या १ लाखको हाराहारीमा छ । कोरोना भाइरस उत्पत्तिदेखि यो अवधिसम्ममा आइपुग्दा कोरोनाका विभिन्न प्रजाति, उप–प्रजातिको उत्पत्ति भइसकेका छन् । एकपछि अर्को प्रजाति झन् शक्तिशाली र उच्च संक्रमणको खतरासमेत देखिँदै गएको अनुसन्धानविद्हरूले बताएका छन् । नेपालमा फैलिएको ओमिक्रोन भाइरसको त्रास उच्च छ । ओमिक्रोन कुल संक्रमितको ८० प्रतिशत रहेको स्वास्थ्य विज्ञहरू बताउँदै आएका छन् ।
कोरोना भाइरस विश्वभरि फैलिएकोे पनि दुई वर्ष पूरा भइसकेको छ । तर, यसको पूर्ण समाधान गर्ने भ्याक्सिनको निर्माण गर्न कुनै पनि मुलुक सफल भएका छैनन् । यद्यपि पूर्ण समाधानका भ्याक्सिन नभए तापनि असरलाई केही कम गर्न सक्ने भ्याक्सिन विभिन्न देशहरूले निर्माण गरेका छन् । हाम्रो मुलुकमा पनि विभिन्न मुलुकको सहयोगमा उपलब्ध गराएका भ्याक्सिनको प्रयोग भएको छ । भेरोसेल, कोभिसिल्ड, जोन्सोनलगायतका खोप यहाँ उपलब्ध छन् । तर, नागरिकले रोजेअनुसारका खोप भने लगाउन पाउँदैनन्, किनभने सरकारले जुन खोपको मौज्दात छ त्यहीअनुसारको खोप अभियानका कार्यक्रम चलाउँदै आइरहेको छ । पहिलो, दोस्रो र तेस्रो अर्थात् बुस्टर डोजको समेत खोप कार्यक्रम चलिरहेको छ । विभिन्न मुलुकले अनुदानमा उपलब्ध गराएको अनि सरकारले केही परिमाणमा खरिद गरी नेपालमा खोप ल्याइएको हो । तर विडम्बना ! हाम्रो मुलुकमा कोरोनाको खोप भण्डारण गरिराखेको ठाउँबाट हराउँदा भने हाम्रो मुलुक कुन दिशातर्फ जाँदै छ भन्नेमा प्रश्नचिह्न उब्जाएको छ । ठूलो परिमाणमा खोप हराउँदा मातहतका कर्मचारी बेखबर छन् । स्वास्थ्य मन्त्रालयले छानबिन समिति गठन गरेको छ । परमादेशको सरकारले खोपलाई प्राथमिकता दिइरहँदा खोप भण्डारणबाटै हराउँदा अन्तर्राष्ट्रिय जगत्मा हाम्रो प्रतिष्ठा कस्तो रहला ? आम नागरिकको स्वास्थ्यसँग जोडिएको खोप सरकारको ढुकुटिमै सुरक्षित छैन भने हामी समृद्ध नेपाल सुखी नेपालीको कल्पना कसरी गर्न सक्छौं ? सरकारले विभिन्न मुलुकबाट ल्याएको खोप परिमाणको तथ्याङ्क छ, नागरिकलाई लगाएको पनि तथ्याङ्क संकलन गरिएको छ तर भण्डारणबाटै खोप हराउँदा सरकार बेखबर छ । यहाँ भित्रभित्रै खोप हराउनु थप नैतिकतामाथि शंका उत्पन्न भएको छ ।
