काठमाडौँ — पहिलो संस्करणको साफ महिला क्लब च्याम्पियनसिप फुटबलको आयोजना नेपालमै हुने भएको छ । प्रतियोगिताबारे अन्तिम निर्णय हुन बाँकी रहेको छ । तर यो प्रतियोगिता सम्भवतः नोभेम्बरमा हुनेछ । ‘प्रतियोगिताको स्वरूपबारे पछि निर्णय गर्नेछौं, तर प्रतियोगिता भने हुने निश्चित भएको छ,’ दक्षिण एसियाली फुटबल महासंघका महासचिव पुरुषोत्तम कट्टेलले शनिबार जानकारी गराएका हुन् ।
महासंघको काठमाडौंमा बसेको कंग्रेसका अवसरमा केही महत्त्वाकांक्षी योजना अगाडि सारिएको छ । महासंघले दक्षिण एसियाली फुटबलको स्तर बढाउन कम्तीमा ११ प्रतियोगिता प्रस्ताव गरेको छ । त्यसमा पुरुष र महिलाको फुटसलदेखि स्कुल प्रतियोगितासम्मको योजना छ । कंग्रेसमा दक्षिण एसियाका सातै देशको सहभागिता रहेको थियो ।
महासचिव कट्टेलले दक्षिण एसियाली क्षेत्रमा प्रो–लाइसेन्सप्राप्त प्रशिक्षक अभाव रहेको हुनाले त्यस्तो जनशक्ति निर्माणका लागि पनि विशेष कार्यक्रम अगाडि ल्याउने बताए । उनका अनुसार भारत र भुटानलाई छाडेर अन्य देशमा प्रो–लाइसेन्स भएका प्रशिक्षक छैनन् र यस्ता प्रशिक्षकको उत्पादन पनि निकै खर्चिलो छ ।
‘हामीले प्रो–लाइसेन्सप्राप्त प्रशिक्षकको उत्पादनका लागि सम्बन्धित देशको फुटबल संघसँगै एसियाली फुटबल महासंघसँग पनि छलफल अगाडि बढाउने छौं । प्रो–लाइसेन्सका लागि निकै खर्च लाग्ने हुनाले पनि यस्तो कार्यक्रम आवश्यक छ । यस्तो कार्यक्रमले नेपाली फुटबललाई पनि निश्चित रूपमा मदत गर्नेछ,’ उनले भने ।
कंग्रेसमा पहिलो पटक पत्रकारलाई प्रवेश दिइएको थियो । दक्षिण एसियाली स्तरमा अहिलेसम्म फुटसलका प्रतियोगिता आयोजना नभएको स्थितिमा यो नयाँ सुरुआत हुनेछ । उनले अबको साफ च्याम्पियनसिप ‘होम अर अवे’ को आधारमा हुने बताउँदै आयोजना स्थलको समस्या भए तटस्थ भूमि रोजिने पनि बताए ।
महासचिव कट्टेलले दक्षिण एसियाली क्षेत्रमा प्रो–लाइसेन्सप्राप्त प्रशिक्षक अभाव रहेको हुनाले त्यस्तो जनशक्ति निर्माणका लागि पनि विशेष कार्यक्रम अगाडि ल्याउने बताए । उनका अनुसार भारत र भुटानलाई छाडेर अन्य देशमा प्रो–लाइसेन्स भएका प्रशिक्षक छैनन् र यस्ता प्रशिक्षकको उत्पादन पनि निकै खर्चिलो छ ।
