व्हाइट हाउसका वरीष्ठ अधिकारीले मस्कको बहिर्गमन तत्काल हुने पुष्टि गरेको रोयटर्सले उल्लेख गरेको छ । मस्कले पनि आफ्नै स्वामित्वको सामाजिक सञ्जाल एक्समा पोस्ट गर्दै ट्रम्प सरकारमा आफ्नो जिम्मेवारीको अन्त्य भएको घोषणा गरेका छन् । अमेरिकी सरकारका विभिन्न निकायमा रहेको अनावश्यक खर्च कटौती गर्ने आफ्नो मिसनमा काम गर्ने अवसरका लागि पनि उनले ट्रम्पलाई धन्यवाद दिएका छन् ।

सरकारका विभिन्न निकायमा भइरहेको लगभग २० खर्ब अमेरिकी डलर खर्च बचाउने घोषणासहित ट्रम्प सरकारमा सहभागी भएका मस्कले २ महिनामै सो रकमलाइ १ खर्ब ५० अर्ब अमेरिकी डलरमा झारेका थिए । यसका लागि ट्रम्पले उनलाई अमेरिकी सरकारको प्रभावकारिता बढाउने विशेष विभाग ‘डज’ को नेतृत्व सुम्पिएका थिए ।

ट्रम्प सरकारको शुरूवातमा जताततै देखिएका मस्क पछिल्लो एक महिनामा खासै सार्वजनिक रूपमा देखिएका छैनन् । अब आफ्नै व्यवसायमा दिनरात काममा फर्कने शैलीका सन्देश दिँदै आएका थिए । मस्कको कार्यशैलीका कारण एकपछि अर्का अमेरिकी नेताहरूसँग विवाद हुन थालेपछि मार्चको अन्त्यतिर ट्रम्प आफैँले मस्कले अब सरकार छोड्ने सार्वजनिक अभिव्यक्ति दिएका थिए ।

झण्डै एक महिनायताका कुनै पनि ट्रुथ सोसल पोस्टमा ट्रम्पले मस्कको नाम लिएका छनन् । सन् २०२६ को मध्यकालीन चुनावका लागि अत्याधिक अलोकप्रिय देखिन थालेपछि रिपब्लिकन पार्टीले समेत मस्कबाट टाढिन सुरू गरेको एपीले उल्लेख गरेको छ ।

यस्तै, ट्रम्पका ट्यारिफ, एआई नीतिलगायत कतिपय विषयमा मस्कले सार्वजनिक रूपमै असन्तुष्टि राखेपछि ट्रम्प सरकारका एक वरिष्ठ अधिकारीले उनलाई ट्रम्पको सामू गाली गरेको पोलिटिकोको समाचारमा भनिएको छ । अमेरिकाको विस्कन्सन राज्यमा भएको एक चुनावमा राम्रो पैसा खर्च गरेर पनि रिपब्लिकन उम्मेद्वारलाई जिताउन नसकेका मस्कले हाल आफ्नो राजनीतिक चन्दामा ठूलो कटौती गर्ने घोषणा गरिसकेका छन् ।

लगभग सय दिनको आफ्नो सरकारी जिम्मेवारीमा निकै उत्साहका साथ छिरेका मस्कमाथि आफैंले भन्ने गरेका पारदर्शिता र जवाफदेहितासँगै दर्जनौं प्रश्न उठेका थिए । यो सय दिनको अवधिमा उनले आफ्नो लोकप्रियतामा गम्भीर गिरावट झेलेका थिए । टेस्लाजस्ता उनका ठूला कम्पनीहरू पनि विश्वका कैयौं बजारमा संघर्ष गर्नुपर्ने स्थितिमा पुगेका छन् ।

मस्कको कार्यशैली र बोलीवचनलाईसमेत अमेरिकाका दुवै पार्टीसँगै जनमानसले रूचाएका थिएनन् । मस्कको बहिर्गमन भए पनि डज भने नयाँ नेतृत्व र संरचनाका साथमा जारी रहने ट्रम्पका मुख्यसचिवले पुष्टि गरेका छन् । तर मस्कको समयमा रहेको डजको केन्द्रीय भूमिका भने स्वत: खुम्चँदै जाने विश्लेषकहरूको अनुमान छ ।

टेस्लाको नाफा लगभग ७१ प्रतिशत र शेयर मूल्य ३३ प्रतिशतले घटेको सन्दर्भमा आफूले व्यवसायमा ध्यान दिनु परेकाले सरकार छोडेको मस्कको दाबी छ । ट्रम्प र उनका प्रमुख सहयोगीहरूले भने राजनीतिक बोझ मान्न थालेकाले उनको निरस बहिर्गमन भएको न्युयोर्क टाइम्सको विश्लेषण छ ।