गोकर्णेश्वर नगरपालिकाले बजार अनुगमनलाई तिब्र बनाएको छ । नगरपालिकाकाले प्रमुख प्रशासकीय अधिकृत वैकुण्ठ प्रसाद सापकोटाको नेतृत्वमा नगरपालिका क्षेत्रभित्र संचालित विभिन्न पसलहरुको अनुगमनलाई तिब्रता दिएको हो ।
गोकर्णेश्वर नगरपालिकाका भित्रका वडाहरुमा रहेका विभिन्न व्यापार तथा व्यवसायको अनुगमन अभियान पहिलेदेखि नै गर्दै आएको छ । मासु पसल,पानी उद्योग,होटल लगायतका पसलहरुको अनुगमन अभियान गरेको छ ।
बजार अनुगमनमा प्रमुख प्रशासकीय अधिकृत वैकुण्ठ प्रसाद सापकोटा,प्रशासन शाखा प्रमुख भुपेन्द्र बोहरा र लेखा अधिकृत रामजी रायमाझी रहेका छन् । अनुगमन अभियानमा दर्ता तथा नविकरण नभएका पसलहरुलाई दर्ता तथा नविकरणका लागि एक हप्ताको म्याद सहित सुझाव दिइएको थियो ।
अनुगमनका क्रममा पसलबाट बिक्री गरिएको खाद्य बस्तुको गुणस्तर कायम भए नभएको, उपभोग्य मिति भए नभएको र त्यसको खरिद देखी बिक्री मुल्य समेत हेरेर कैफियत देखिए तत्कालै कारवाही समेत गरिने भएको छ ।
बजारमा कालोबजारी हुन नदिने र उपभोक्ताको स्वस्थकर गुणस्तरीय उपभोग्य सामग्री खान पाउने अधिकार सुनिश्चित गर्न र व्यवसायीहरुलाई करको दायरामा ल्याउन पनि नगरपालिकाले बजार अनुगमनलाई तिब्रता दिएको हो ।
नगरपालिकाले कर शुल्क दस्तुर बुझाउने सम्बन्धमा समेत व्यापारीहरुलाई सचेत गराएको छ । आर्थिक वर्ष २०८०–८१ को नगरपालिकाले नीति तथा कार्यक्रम र बजेट बिनियोजन गर्ने समय आएकाले पनि बजार अनुगमनलाई तिब्रता दिएको प्रमुख प्रशासकीय अधिकृत वैकुण्ठ प्रसाद सापकोटाले जानकारी दिएका छन् ।
