प्रथम राष्ट्रिय उसु अवार्ड तथा सम्मान कार्यक्रम-२०२२ सम्पन्न
राष्ट्रिय उसु महासंघ नेपालले राष्ट्रमा नै पहिलो पटक ऐतिहासिक राष्ट्रिय उसु अवार्ड तथा सम्मान कार्यक्रम सम्पन्न गरेको छ।
उसु खेलमा आफ्नो सम्पूर्ण जीवन विताएका हस्तिहरुलाई र सर्जकहरुलाई उक्त कार्यक्रममा सम्मान तथा नगद पुरस्कार प्रदान गरिएको थियो।१३औँ दक्षिण एसियाली खेलकुद (साग) का स्वर्ण विजेता जुनी राई र दीपक हमाल सर्वोत्कृष्ट खेलाडी बनेका छन् । नेपाल उसु महासङ्घद्वारा बुधवार आयोजित प्रथम उसु अवार्डमा जुनी महिलातर्फ र दीपक पुरुषतर्फ सर्वोत्कृष्ट खेलाडी घोषित भएका हुन् । उनीहरूलाई २५ हजार रुपैयाँ नगद प्रदान गरिएको थियो ।

यसै गरी प्रकाशबहादुर लामा थाउलो र गणेश अर्याल सान्सौका उत्कृष्ट प्रशिक्षक घोषित भएका थिए । उनीहरूले पनि २५ हजार रुपैयाँ पुरस्कार पाए । कार्यक्रममा नेपालमा उसुका संस्थापक प्रनिलध्वज कार्कीलाई लाइफ टाइम अचिभमेन्ट अवार्ड प्रदान गरिएको थियो ।
कार्यक्रममा १३औँ सागका स्वर्ण पदक विजेता खेलाडीलाई सम्मान गरिएको थियो । स्वर्ण विजेता जुनी राई, दीपक हमाल, विजय सिंजाली, सुस्मिता तामाङ र निमा घर्ती मगरलाई १० हजार रुपैयाँ सहित सम्मान गरिएको होे । यसै गरी सागका विभिन्न संस्करणका स्वर्ण विजेतासँगै १३औँ सागका रजत र कांस्य पदक विजेता खेलाडीलाई पनि सम्मान गरिएको थियो । यस्तै १३औँ सागमा सहभागी प्रशिक्षकलाई पनि सम्मान गरिएको थियो ।

कार्यक्रममा साताव्यापी डिप्लोमा कोर्स र जर्ज सेमिनारमा सहभागीलाई प्रमाणपत्र वितरण गरिएको थियो । डिप्लोमा कोर्समा महिलातर्फ कैलालीकी पुष्पा कुँवर र पुरुषतर्फ नुवाकोटका राजीव तामाङ उत्कृष्ट घोषित भएका थिए । यस्तै जर्ज सेमिनारमा नुवाकोटकी मिना ग्लान र मोरङका अजय बुढाथोकी उत्कृष्ट बनेका थिए । अवार्ड कार्यक्रममै डिप्लोमा कोर्स र जर्ज सेमिनारमा सहयोग गर्ने निर्णायकसँगै स्वयंसेवक प्रशिक्षकलाई पनि सम्मान गरिएको थियो ।

उनीहरूलाई पूर्व मन्त्री एवं नेपाली काँग्रेसका नेता मोहनबहादुर बस्नेत, नेपाल ओलम्पिक कमिटीका महासचिव निलेन्द्रराज श्रेष्ठ, गोकर्णेश्वर नगरपालिकाका प्रमुख दीपककुमार रिसाल, नेपाल उसु महासङ्घका अध्यक्ष वीरबहादुर तामाङ, महासचिव लाक्पा छिरिङ लामा लगायतले सम्मान गरेका थिए ।
कार्यक्रममा ११,१२ र १३ औं कुवान उसु प्रतियोगितामा नेपालको लागि स्वर्ण जित्ने खेलाडिलाई पनि नगद पुरस्कार सहित सम्मान गरिएको थियो।
पूर्वमन्त्री एवं कांग्रेस नेता मोहन कुमार बस्नेतले आफू खेलकुद विभागमा आउने सम्भावना प्रवल भएको र देशको निम्ति रगत पसिना खर्चने खेलाडिलाई अवस्य सहयोग गर्ने नीति निर्माण गर्ने आश्वासन दिए भने उक्त कार्यक्रमलाई सहयोगार्थ नगद रु.५१,०००/- समेत प्रदान गरे।
कार्यक्रमलाई विभिन्न सन्स्थाहरुले सहयोग गरेको थियो भने उक्त सन्स्थालाई सम्मान समेत आयोजकले गतेको थियो।