चन्द्रागिरी केबुलकार सञ्चालक समितिले शुक्रबार पत्रकार सम्मेलनको आयोजना गरी केबलकार सञ्चालनका लागि विद्युत, जेनेरेटरसँगै इमर्जेन्सी ड्राइभ प्रयोग गरिएको जाकारी दिएको हो ।
पत्रकार सम्मेलनमा अध्यक्ष चन्द्र ढकालले सेवा सञ्चालनमा प्राविधिक समस्या आएको खण्डमा इमर्जेन्सी ड्राइभमार्फत यात्रु उद्धार गर्न सकिने बताए ।
ढकालले भने ‘बिजुली र जेनेरेटरले काम नगर्दा इमर्जेन्सी ड्राइभमार्फत यात्रुलाई गोन्डेलाबाट उद्धार गरिन्छ। यो अवस्थामा भालेश्वरमा अड्किनु भएका यात्रुलाई सडकमार्गमार्फत उद्धार गर्न सक्छौं। यसको अलावा हामीले आफ्नै रिसोर्टमा पनि राख्न सक्छौं। रेस्टुरेन्ट सेवा दिन सक्छौं ।’
पूर्ण अटोमेटेड प्रविधि मार्फतको सेवा दिएका कारण चन्द्रागिरी केबुलकार विश्वकै सुरक्षित रहेको संस्थापक सदस्य अम्बिका पौडेलले बताए। विश्वभर २० हजारभन्दा बढी केबुलकार सेवा रहेको जानकारी दिँदै उनले चन्द्रागिरी केबुलकार अन्तर्राष्ट्रियस्तरमै शतप्रतिशत सुरक्षित भएको दाबी गरे ।
उक्त कार्यक्रममा आकस्मिक उद्धारमा कम्पनी सतर्क रहेको इन्जिनियर सरोज चापागाइले बताए।कम्पनीले सेवा सञ्चालनअघि पनि हरेक दिन चेकलिस्ट अनुसार विस्तृत रूपमा प्राविधिक निरीक्षण गर्दै आएको उनले बताए।
‘समस्या आएको अवस्थामा सक्दो तत्काल समाधान गर्दै आएका छौं। भएन भने इमरजेन्सी ड्राइभमार्फत ४० मिनेटमै उद्धार गर्नेछौं,’उनले भने।
