सरकारले हालै प्रतिनिधिसभामा पेश गरेको नागरिकता विधेयकमा ५४ जना सांसदले संशाेधन प्रस्ताव दर्ता गराएका छन्। यसअघि संसदमा पेश भएको नागरिकता बिधेयक फिर्ता लिएर पुनः सरकारले नयाँ बिधेयक पेश गरे पछि ५४ जना सांसदले संशाेधन प्रस्ताव दर्ता गराएका हुन्।
संघीय संसद सचिवालयका अनुसार नेपाल नागरिकता ऐन, २०६३ लाई संशोधन गर्न बनेको विधेयकमा ५४ सांसदले ३१ वटा संशोधन प्रस्ताव दर्ता गराएका छन्।
यसरी संशोधन दर्ता गराउने अधिकांश सांसदले नेपाली नागरिकसँग विवाह गरेर आउने विदेशी महिलाले नेपालमा बसोबास गरेको ७ वर्ष पछि मात्रै नागरिकता प्रमाणपत्र दिनुपर्ने प्रावधान राख्नुपर्ने उल्लेख गरेका छन्।
राज्यव्यवस्था तथा सुशासन समितिले दुई वर्षअघि नै विधेयकमाथि दफावार छलफल गरी प्रतिनिधिसभामा प्रतिवेदन पेश गरिसकेको भएपनि हालै सरकारले सो बिधेयक फिर्ता लिएर नयाँ बिधेयक दर्ता गराएको हो।
सो बिधेयकमा दलहरुबीच पूर्ण सहमति नभएपनि समितिले विदेशी महिलालाई नागरिकता लिन ७ वर्ष कुर्नुपर्ने संशोधन राख्ने विषय बहुमतले निर्णय गरेको थियो ।
पुनः संसदमा पेश भएको नागरिकता बिधेयकमा चार दर्जन भन्दा बढी संशाेधन प्रस्ताव दर्ता भए पछि सरकारले सो बिधेयक आजको प्रतिनिधिसभा बैठकमा अघि बढाएको छैन।
