जनकपुरधाम उपमहानगरको प्रमुख पद जसपालाई दिएको भन्दै धनुषा कांग्रेसमा असन्तुष्टि चुलिएको छ । गठबन्धनको निर्णयको विरोधमा कांग्रेसको उपमहानगर समितिले बुधबार राति सत्तासीन दलका शीर्ष नेताको पुतला दहन गरेको थियो । समितिले विज्ञप्ति निकालेर निर्णय सच्याउन पार्टी नेतृत्वलाई आग्रह गरेको छ । कांग्रेस नगर समितिका सभापति तथा जनकपुर उपमहानगरमा प्रमुखका दाबेदार मनोज साहले बिहीबार निर्णय नसच्याए सामूहिक राजीनामा गर्ने धम्की दिएका छन् ।
साहले आफूसहित नगर समितिका २५ वटै वडा सभापति, पार्टीका समर्थक र मतदाता गठबन्धनको विरोधमा रहेको बताए । उनले भने, ‘जनकपुरधामका प्रमुखले पाँच वर्षसम्म गरेका गलत काममा हामी भागीदार हुन सक्दैनौं, कांग्रेस केन्द्रीय समितिले निर्णय सच्याएन भने २५ वटै वडामा स्वतन्त्र उम्मेदवारी दिन्छौं ।’ पाँच दलीय गठबन्धनले उपमहानगरको नेतृत्व जसपाको भागमा पारेको सुनेर २५ वटै वडाका कांग्रेस सभापति, नगर सदस्य, नगर पदाधिकारी र नेता–कार्यकर्ता आक्रोशित बनेको विज्ञप्तिमा उल्लेख छ । गठबन्धनको निर्णयले कांग्रेसलाई ठूलो क्षति पुर्याउने उनले बताए ।
२०७४ को स्थानीय तह निर्वाचनमा तत्कालीन राजपाका लालकिशोर साह २१ हजार ९ सय ३ मत ल्याई विजयी भएका थिए भने कांग्रेसका मनोज साहले ११ हजार २ सय र उपेन्द्र यादव नेतृत्वको तत्कालीन संघीय समाजवादी फोरमका उम्मेदवारले ३ हजार ३ सय मत प्राप्त गरेका थिए । मतभारको आधारमा पद बाँडफाँट गर्नुको सट्टा गठबन्धन दलले व्यक्ति विशेषको आधारमा बाँडफाँट गरेको आरोप कांग्रेस नेता साहको छ । ‘अहिलेका मेयर लालकिशोरजी यादव नेतृत्वको जसपामा हुनुहुन्छ, त्यतिबेलाको फोरम र अहिलेको जसपा एउटै हो, मतभारको आधारमा जनकपुरमा कांग्रेसले मेयर पाउनुपर्ने हो,’ उनको तर्क छ ।
कांग्रेसका पूर्वउपसभापति विमलेन्द्र निधि गठबन्धन दलको निर्णयबाट असन्तुष्ट छन् । ‘मैले शेरबहादुरजी र रामचन्द्रजी दुवैलाई जनकपुर कांग्रेसको भागमा राख्न आग्रह गरेको थिएँ तर त्यसपछि के भयो ? मलाई थाहा भएन,’ उनले भने । निधि पक्षका कांग्रेस धनुषाका सभापति योगेन्द्र पञ्जियारले गठबन्धन दलको निर्णयले कांग्रेसका नेता–कार्यकर्ता आक्रोशित बनेको बताएका छन् ।
देउवापक्षीय नेता सन्तोष यादवले भने गठबन्धन दलले गरेको निर्णयलाई स्वागत गरेका छन् । उनले भने, ‘या त गठबन्धन तोडेर प्रधानमन्त्री र सात प्रदेशको सरकारबाट हट्नुपर्यो या गठबन्धनको निर्णय मान्नुपर्यो ।’
