सत्तारूढ पाँचदलीय गठबन्धनले गरेको भागबन्डामा वीरगन्ज महानगरपालिका जनता समाजवादी पार्टी (जसपा) को भागमा परेपछि कांग्रेसका स्थानीय नेता असन्तुष्ट बनेका छन् । आसन्न स्थानीय तह निर्वाचनमा वीरगन्जको प्रमुख जसपा र उपप्रमुख कांग्रेसले उठाउने निर्णय गठबन्धनले गरेको छ ।
कांग्रेसको स्थानीय नेतृत्वले मधेस प्रदेशको एक मात्र महानगरपालिका वीरगन्जमा कुनै पनि दलसँगको गठबन्धन स्वीकार नहुने निर्णय यसअघि गरिसकेको थियो । कांग्रेसका आधा दर्जनभन्दा बढी नेता महानगर प्रमुखका आकांक्षी छन् । पाँचदलीय गठबन्धनले बाँडफाँटको निर्णय सार्वजनिक गरेसँगै पर्सा कांग्रेसका सभापति जनार्दनसिंह क्षत्री, केन्द्रीय सदस्य रमेश रिजाल, संविधानसभा सदस्य अनिल रुँगटा, कांग्रेस महासमिति सदस्य राकेश सिंहलगायतको टोली बुधबार पार्टी सभापति एवं प्रधानमन्त्री शेरबहादुर देउवालाई भेट्न काठमाडौं गएको थियो । ‘हामीले प्रधानमन्त्रीलाई भेटेर वीरगन्ज जसपालाई दिने निर्णय पुनर्विचार गर्न आग्रह गरेका थियौं,’ क्षत्रीले भने, ‘उहाँले हुन्छ भन्नुभयो तर बिहीबार अपराह्नसम्म केही भएको छैन, सम्भावना कम छ ।’
०७४ को स्थानीय चुनावमा वीरगन्जमा १९ हजार ३ सय ९३ मत पाएर तत्कालीन संघीय समाजवादी फोरमबाट विजयकुमार सरावगी प्रमुख र १९ हजार ६ सय ७ मत ल्याएर कांग्रेसकी शान्ति कार्की उपप्रमुख विजयी भएका थिए । सरावगी गत फागुन २८ मा एमाले प्रवेश गरिसकेका छन् । सरावगीका प्रतिस्पर्धी कांग्रेसका अजय द्विवेदीले १७ हजार १ सय ९७ मत पाएका थिए ।
सत्ता गठबन्धनको नाममा वीरगन्ज महानगरपालिका अन्य दललाई छाड्दा आगामी संघीय र प्रदेश निर्वाचनमा कांग्रेस उम्मेदवारलाई अप्ठ्यारो पर्ने नेताहरूको बुझाइ छ । ‘अघिल्लो चुनावमा मधेस आन्दोलनको राप, ताप र केही प्राविधिक कारणले गर्दा वीरगन्ज महानगरको प्रमुखमा हाम्रा उम्मेदवार पराजित भएका थिए,’ कांग्रेसका एक महाधिवेशन प्रतिनिधिले भने, ‘उपप्रमुखले पाएको भोट कांग्रेसको वास्तविक हो, आन्दोलनपछि चुनाव जितेका प्रमुख पनि अहिले अर्कै पार्टीमा गइसके, तैपनि कांग्रेसले गठबन्धनको नाममा जसपालाई वीरगन्ज महानगर किन छाड्दै छ ? बुझिनसक्नु छ ।’
महानगरले दुईवटा प्रतिनिधिसभा निर्वाचन क्षेत्र र चारवटा प्रदेशसभा क्षेत्र ओगट्छ । ‘गठबन्धनको नाममा पर्सामा कांग्रेसलाई कमजोर बनाउने काम हुँदै छ, यो कांग्रेसजनको हितमा छैन,’ उनले भने, ‘महानगरको स्रोत–साधनले चुनावका बेला धेरै प्रभाव पार्ने अघिल्लो निर्वाचनमै देखिइसकेको छ ।’
जानकारका अनुसार गठबन्धन नहुँदा वीरगन्जमा कांग्रेस, एमाले र जसपाको त्रिपक्षीय भिडन्त हुने देखिन्छ । ‘गठबन्धन हुँदा कांग्रेसका समर्थकले जसपाका उम्मेदवारलाई सघाउँछन् कि एमालेका उम्मेदवारलाई भन्न गाह्रो छ,’ गुप्ताले भने । अघिल्लो प्रतिनिधिसभा निर्वाचनमा कांग्रेस पर्साका चारवटै क्षेत्रमा पराजित भएको थियो भने आठ सिट रहेको प्रदेश सभामध्ये दुईवटामा विजयी भएको थियो । ‘कांग्रेसको गढ मानिएको पर्सामा गठबन्धनको नाममा सबै सिट साबिक जितेको पार्टीको भागमा पर्दै गयो भने कांग्रेस नेताहरूको भविष्य के हुन्छ ?’ उनले भने, ‘पार्टी परित्याग गरी स्वतन्त्र उम्मेदवारीको शक्ति देखाउँछन्, कि देखाउँदैनन् त्यो हेर्न बाँकी छ ।’
एमाले–लोसपा तालमेल वीरगन्जमा एमाले र लोकतान्त्रिक समाजवादी पार्टी (लोसपा) बीच पनि तालमेल हुने भएको छ । वीरगन्जमा बिहीबार पत्रकार सम्मेलन गरी दुवै पार्टीका नेताहरूले तालमेलको घोषणा गरेका हुन् । लोसपा वरिष्ठ नेता लक्ष्मणलाल कर्णले प्रमुख एमाले र उपप्रमुख लोसपाले लिने गरी तालमलको सहमति भएको जानकारी दिए । एमालेबाट विजयकुमार सरावगी प्रमुखको उम्मेदवार सिफारिस भएका छन् । यसअघि लोसपाका जिल्ला अध्यक्ष पुरुषोत्तम झाले प्रमुखमा लड्ने घोषणा गरेका थिए । एमालेसँग तालमेलपछि लोसपाबाट उपप्रमुखमा को लड्ने भन्ने सम्बन्धमा छलफल भइरहेको नेताहरूले जनाएका छन् । लोसपा नेता कर्णले वडाहरूमा समेत तालमेल गरिने बताए । एमाले मधेस इन्चार्ज रघुवीर महासेठले गठबन्धन घोषणा भएपछि संयुक्त रूपमा निर्वाचन परिचालन समिति गठन गरी अगाडि बढ्ने जनाए । एमाले जिल्ला अध्यक्ष जयप्रकाश थारू र लोसपा जिल्ला अध्यक्ष झाले वीरगन्जमा मिलेर सहभागी हुने सहमतिपत्रमा हस्ताक्षर गरेका छन् ।
