पूर्वी नवलपरासीमा सत्ता गठबन्धन दलहरुको वैठक वसी नवलपुरमा जिल्ला स्तरीय संयन्त्र गठन गरेको छ ।
आगामी बैशाख ३० गते हुने स्थानीय तहको निर्वाचनलाई लक्षित गरी आज नेकपा माओवादी केन्द्रको कावासोती स्थित पार्टी कार्यालयमा सत्ता गठबन्धन ५ दलको वैठक बसेको हो ।
वैठकले नेपाली काँग्रेसका जिल्ला सभापति महेन्द्रध्वज जिसी संयोजक रहने गरी जिल्ला स्तरीय संयन्त्र गठन भएको नेपाली काँग्रेस नवलपुरका सचिव होमराज रानाभाटले बताए ।
संयन्त्रमा नेकपा माओवादी केन्द्रको तर्फबाट मित्रशरण शर्मा विहानी, नेकपा एकीकृत समाजवादीको तर्फबाट सालिकराम भट्टराई, संघीय समाजवादीको तर्फबाट धनबहादुर गुरुङ्ग र जनमोर्चाको तर्फबाट दीपक पाण्डे सदस्य रहेका छन् ।
वैठकले नवलपुरका आठ वटै पालिकाहरुमा नेपाली काँग्रेसका पालिका सभापति संयोजक रहने गरी पालिका स्तरको संयन्त्र पनि गठन गरेको छ ।
वैठकमा सहभागी नेकपा माओवादी केन्द्रका नेता मित्र शरण शर्मा विहानीले जिल्ला संयन्त्रको वैठकले नवलपुरका सबै पालिकाहरुमा स्थानीय तहको निर्वाचनमा गठबन्धन गरेर जाने सहमति भएको बताए ।
त्यसैगरी २ दिन भित्र पालिका स्तरका संयन्त्रहरुलाई पालिकाको गठबन्धनको वस्तुगत अवस्था के हो र अन्य दलहरुको अवस्था के हो त्यसको प्रतिवेदन बुझाउन निर्देशन दिएको बताए ।
पालिका स्तरको संयन्त्रको वैठक ८ वटै पालिकामा भोलि नै बस्ने जनाइएको छ ।
पालिका स्तरको संयन्त्रले पठाएको प्रतिवेदनमाथि जिल्ला संयन्त्रको २२ गते बस्ने वैठकमा छलफल गरे केन्द्रिय संयन्त्रमा पठाउने विहानीले बताए ।
