काठमाडौँ । प्रधानमन्त्री शेरबहादुर देउवाको भारत भ्रमणतालिका सार्वजनिक भएको छ। भारतीय समकक्षी नरेन्द्र मोदीको निमन्त्रणामा प्रधानमन्त्री देउवा यही चैत १८ गते भारतको तीनदिने भ्रमणमा निस्किदै छन्। परराष्ट्र मन्त्रालयले सोमबार भ्रमण तालिका सार्वजनिक गरेको हो। जसमा प्रधानमन्त्रीका साथ उनकी पत्नी डा. आरजु राणा देउवा पनि भ्रमणमा जानेछन् । भ्रमण टोलीमा परराष्ट्रमन्त्री डा. नारायण खड्काकासाथै अन्य वरिष्ठ मन्त्री, सचिव र अधिकारी सहभागी हुने भएका छन् । उक्त भ्रमणले नेपाल र भारतबीचको बहुआयामिक, सदियौं पुरानो र सौहार्दपूर्ण सम्बन्धलाई थप प्रगाढ बनाउने विश्वास मन्त्रालयले व्यक्त गरेको छ । भ्रमणका क्रममा प्रधानमन्त्रीले भारतका उपराष्ट्रपतिसँग शिष्टाचार भेट गर्ने कार्यक्रम छ । प्रधानमन्त्रीले चैत १९ गते हैदरावाद हाउसमा भारतका प्रधानमन्त्री मोदीसँग प्रतिनिधिमण्डलस्तरीय वार्ता गर्ने तय भएको छ । मोदीले प्रधानमन्त्री देउवा र प्रतिनिधिमण्डलको सम्मानमा दिवा भोजको आयोजना गर्ने तालिका बनेको छ । भ्रमणका क्रममा प्रधानमन्त्री देउवा र भारतीय समकक्षी मोदीले संयुक्त रूपमा जनकपुर–जयनगर रेलको भर्चुअल उद्घाटन गर्ने तयारी रहेको मन्त्रालयका अधिकारीको भनाइ छ । भारतले स्थानीय तह निर्वाचनका लागि विभिन्न सहयोग घोषणा गर्नेलगायत तयारी पनि भइरहेको छ । नयाँ दिल्लीमा भ्रमणको तयारी गर्न भारतका लागि नवनियुक्त नेपाली राजदूत डा. शंकर शर्मा सक्रिय भएका छन् ।
