लुम्बिनी प्रदेशमा आज भएका छुट्टाछुट्टै घटनामा ४ जनाको मृत्यु भएको छ । कपिलवस्तु, बर्दिया, रुपन्देही र बाँकेमा भएका छुट्टाछुट्टै घटनामा ४ जनाको मृत्यु भएको प्रहरीले जनाएको छ । प्रहरीका अनुसार सवारी दुर्घटनामा २, करेन्ट लागेर १ र डुबेर १ जनाको मृत्यु भएको हो ।
कपिलवस्तु जिल्लाको वाणगंगा नगरपालिका–३ ववनीस्थित सडकमा लु.३२ प ४७८० नम्बरको मोटरसाइकल र प्रदेश २–०३–०२१ प ९६०२ नम्बर स्कुटर एक–आपसमा ठक्कर खाएर भएको दुर्घटनामा मोटरसाइकल चालक सोही नगरपालिका–८ बस्ने २५ वर्षीय नमु पौडेलको मृत्यु भएको छ ।
त्यस्तै बर्दिया जिल्ला बारबर्दिया नगरपालिका–८ रम्बापुरस्थित सडकमा रोकी राखेको अनटेष्ट लेखिएको जेसिबीमा कर्णाली प्रदेश २ –००१ प २४६१ नम्बरको मोटरसाइकल ठक्कर खाएर भएको दुर्घटनामा मोटरसाइकलमा सवार ठाकुरबाबा नगरपालिका–९ घर भएका २३ वर्षीय धनबहादुर चौधरीको मृत्यु भएको छ । जेसिबी चालकलाई प्रहरीले नियन्त्रणमा लिएर आवश्यक अनुसन्धान गरिरहेको छ ।
यता, रुपन्देहीमा करेन्ट लागेर एक जनाको मृत्यु भएको छ भने बाँकेमा डुबेर एक जनाको मृत्यु भएको छ । रुपन्देहीको कञ्चन गाउँपालिका–३ हरैया बस्ने २६ वर्षीया चमेली थापाको करेन्ट लागेर मृत्यु भएको हो । आफ्नै घरमा पानी चलाउने मोटरबाट करेन्ट लागेर गम्भीर घाइते भएकी उनको भैरहवा मेडिकल कलेजमा उपचारको क्रममा मृत्यु भएको प्रहरीले जनाएको छ ।
