काठमाडौँ — नेपाल विद्यार्थी संघ (नेविसंघ) ले विधानसम्मत महाधिवेशनको माग गर्दै बिहीबार नेतृत्वलाई दबाब दिएको छ । पार्टीको केन्द्रीय कार्यसम्पादन समितिको बैठक चलिरहँदा नेविसंघका नेताहरूको एक समूहले दबाबपूर्ण प्रदर्शन गरेको हो ।
तर उक्त प्रदर्शन अघिल्ला आन्दोलनभन्दा फरक शैलीको देखिएको छ । प्रदर्शनको क्रममा विद्यार्थी नेताहरूले चर्का नारावाजी गर्नुको सट्टा सिर्जनात्मक शैली अपनाएका छन् । उनीहरूले नेविसंघको झण्डाको चित्र कोरेर नेताहरूलाई बुझाएका हुन् ।
पार्टीका नेता कृष्ण प्रसाद सिटौला, प्रदीप पौडेल निकटका विद्यार्थीहरूको समूहले महाधिवेशनको माग गर्दै नेतृत्वलाई दबाब दिएको हो । पूर्वकेन्द्रीय सदस्य सुशील भट्ट , रत्नहरी ढुंगेल, नवराज त्रीपाठी, पूर्व सहमाहमन्त्री प्रमेश्वर साह, तरुण दलका नेता भागवत रेग्मी, विद्यार्थी नेताहरू हरी आचार्य, दीपक ओझा, जीवन राना, कीरण भट्टराई , सन्तोष गुरुङ लगायत नेताहरूको नेतृत्वमा सानेपास्थित पार्टी कार्यालय अगाडि महामन्त्री विश्वप्रकास शर्मालाई झण्डाको चित्र हस्तान्तरण गरेका हुन् ।
उनीहरूले नेविसंघको झण्डाको चित्र बनाएर पार्टी सभापतिसहित केन्द्रीय कार्यासम्पादन समिति सदस्यहरू समेतलाई बुझाएका हुन्। यस्तो प्रदर्शनलाई उनीहरूले शांकेतिक प्रदर्शन भएको प्रतिक्रिया दिएका छन् । महामन्त्री विश्वप्रकास शर्मा र मुख्य सचीव कृष्ण पौडेल मार्फत् उनीहरूले नेविसंघको झण्डा मूल नेतृत्वलाई बुझाएका हुन् । विद्यार्थी नेता सुवास घिमिरेका अनुसार उनीहरूले केन्द्रीय कार्यसमितिका सदस्यसमेतलाई नेविसंघको झण्डासहितको ‘विधानसम्मत महाधिवेशन सुनिश्चित गर’ लेखिएको प्लेकार्ड बुझाएका थिए।
नेविसंघका नेता सुशील भट्टले लामो समय महाधिवेशन हुन नसक्दा अन्योल भएको भन्दै नेतृत्वलाई दबाब दिन रचनात्मक विधि अपनाइएको बताए । उनले सेतो सादा कागजमा नेविसंघको झण्डासहितको चित्र बनाएर नेतृत्वलाई दबाब दिइएको जानकारी दिए । छिटोभन्दा छिटो महाधिवेशन हुनुपर्ने आफूहरूको माग रहेको र सोहीअनुसार नेतृत्वले वातावरण बनाउनुपर्नेमा उनीहरूले जोड दिएका छन् ।
पार्टी कार्यालयमा बोलाइएको केन्द्रीय कार्यसमिति बैठकमा नेविसंघको महाधिवेशनसहित विभिन्न विषयमा छलफल हुने कार्यक्रम रहेको छ । नेविसंघको महाधिवेशन माग गर्दै विद्यार्थीहरूले यसअघि नै नेताहरूको ध्यानाकर्षण गराउँदै आएका छन् ।
