काठमाण्डाै – सुकुम्वासी माेर्चा नेपालले बसाेबासकाे आधारमा लालपुर्जा वितरण गर्न माग गर्दै सरकारको ध्यानाकर्षण गइएको छ । आज सोमवार संयुक्त राष्ट्रिय सुकुम्वासी मोर्चा नेपालले याे माग गर्दै काठमाण्डाैकाे माइतीघर मण्डलादेखि बिजुलीबजारसम्म ध्यानाकर्षण र्याली गरेको हो । कार्यक्रममा बोल्दै मोर्चाका अध्यक्ष कुमार कार्कीले बसोबासको आधारमा लालपुर्जा वितरण तथा स्थायी विकल्पविनाको उठीवास सदाका लागि बन्द गर्न सम्बन्धित निकायलाई दबाबमूलक ध्यानाकर्षण र्याली गरेको बताउनुभयो । उहाँले एउटा सरकारले लालपुर्जा दिन फारम भर्ने, अर्को सरकार उठीबासको सूचना टाँस्दै हिँडेकाले सरकारको दाेहाेराे चरित्रको विरुद्धमा ध्यानाकर्षण गराएको बताउनुभयो । अध्यक्ष कार्कीले अधिकार प्राप्तिका निम्ति प्रदर्शन गर्दा प्रशासनले छेक्ने काम गरेको आरोपसमेत लगाउनुभयो । उहाँले सरकारले सुकुम्बासीहरूका झुपडी भत्काउने काम गरेकाले त्यसतर्फ ध्यानाकर्षण गराएको र राजनीतिक दलहरूले आफ्नो घोषणापत्रमा भने अनुसार आफूहरूकाे समस्या समाधान गर्नुपर्ने बताउनुभयो । अध्यक्ष कार्कीले सरकारले सुकुम्वासीहरूकाे समस्या तत्काल सम्बोधन नगरे देशभर प्रदर्शन गर्ने चेतावनीसमेत दिनुभयो ।
