आगामी २५ जुलाईबाट भारतमा हुने तय भएको यू २० साफ च्याम्पियनसिपका लागि नेपाली टिमको घोषणा गरिएको छ। प्रशिक्षक मेघराज केसीले सोमबार २३ सदस्यीय टिमको घोषणा गरेका हुन्।
केसीले बन्द प्रशिक्षणमा रहेका ३० खेलाडीबाट साफ खेल्ने टिमको घोषणा गरेका हुन्। च्याम्पियनसिपमा आयोजक भारत, नेपाल, माल्दिभ्स, श्रीलंका र बंगलादेशको सहभागिता रहेको छ।
च्याम्पियनसिपको उद्घाटन खेलमा नेपालले माल्दिभ्सको सामना गर्ने छ। २५ जुलाईमा भुवनेश्वरस्थित कालिङ्गा स्टेडियममा हुने उद्घाटन खेलमा नै नेपाल आफूलाई दाबेदार बनाउने लक्ष्यसहित मैदानमा उत्रिनेछ। प्रतियोगिताको दोस्रो खेलमा श्रीलंकासँग जुलाई २७ मा नेपालले अर्को प्रितस्पर्धा गर्दा भारतसँग ३१ जुलाईमा र अन्तिम खेल बंगलादेशसँग २ अगस्टमा खेल्नेछ।त्यसपछि अंक तालिकामा शीर्ष दुईमा रहने टिमले उपाधिका लागि ५ अगस्टमा प्रतिस्पर्धा गर्नेछन्।
