काठमाडौँ — मिर्गौला प्रत्यारोपण गरेका ३७ वर्षीय पेम्बा शेर्पाले सगरमाथा आरोहण गरेर कीर्तिमान बनाएका छन् । सोलुखुम्बुको माप्या दूधकोशी गाउँपालिकाका उनले बुधबार बिहान ९:३० बजे सगरमाथाको चुचुरोमा पाइला राखेका थिए ।
पेम्बालाई सगरमाथा आरोहण गराउने एक्सपिडिसन हाई माउन्टेन ट्रेक्सका प्रबन्ध निर्देशक पेम्बा ग्याल्जे शेर्पाका अनुसार मिर्गौला प्रत्यारोपण गरेको व्यक्तिले यसअघि सगरमाथा आरोहण गरेको अभिलेख छैन । ‘पेम्बा सगरमाथा आरोहण गर्ने पहिलो मिर्गौला प्रत्यारोपित व्यक्ति हुन्,’ उनले भने ।
रेकर्ड होल्डर पेम्बाले आरोहणअघि नै ‘गिनिज वर्ल्ड रेकर्ड’ मा फाराम बुझाइसकेको पनि प्रबन्ध निर्देशक ग्याल्जेले जानकारी दिए । आरोही पेम्बा शुक्रबार ५२ सय मिटर उचाइमा रहेको आधार शिविरमा ओर्लिइसकेका छन् ।
पेम्बा शेर्पा पर्यटन व्यवसायी होइनन् । उनले गुम्बामा लामा अध्ययन गरेका थिए । ‘सानामा पेम्बा र म सँगै लामा अध्ययन गर्थ्यौं । पछि हामी दुवैले अध्ययनलाई निरन्तरता दिन सकेनौं,’ एक्सपिडिसन हाई माउन्टेनका प्रबन्ध निर्देशक ग्याल्जेले भने, ‘पछि म पर्यटन व्यवसायमा आएँ । पेम्बा दुबई गएछन् । त्यहाँ ५ वर्ष बिताएछन् । फेरि जापानमा ५ वर्ष बिताएछन् । कोभिडको समयमा नेपाल आएपछि उनले दुवै मिर्गौला फेल भएको थाहा पाएका थिए ।’
पेम्बालाई उनकै बुवा आङ ग्याल्जेन शेर्पाले दिएको मिर्गौला प्रत्यारोपण गरिएको थियो । दुई सन्तान र पत्नीसहित काठमाडौंको गोकर्णमा बस्दै आएका पेम्बा जापानी भाषाका प्रशिक्षक हुन् ।
पेम्बाको रेकर्डबारे औपचारिक जानकारी प्राप्त नभएको पर्यटन विभागले जनाएको छ । ‘रेकर्डका लागि सगरमाथा आरोहण गर्नेले विभागलाई औपचारिक जानकारी दिन्छन् तर उनका बारेमा जानकारी प्राप्त भइसकेको छैन,’ खुम्बु क्षेत्रमा रहेका विभागका एक अधिकारीले कान्तिपुरसँग भने ।
पर्यटन विभागले यसपटक वसन्तकालीन हिमाल आरोहणका लागि ७३ देशका १ हजार १ सय ६८ जनालाई अनुमति दिएको छ । सगरमाथा आरोहणका लागि अनुमति पाउने ४ सय ६८ जना छन् ।
रेकर्ड होल्डर पेम्बाले आरोहणअघि नै ‘गिनिज वर्ल्ड रेकर्ड’ मा फाराम बुझाइसकेको पनि प्रबन्ध निर्देशक ग्याल्जेले जानकारी दिए । आरोही पेम्बा शुक्रबार ५२ सय मिटर उचाइमा रहेको आधार शिविरमा ओर्लिइसकेका छन् ।
