‘पालिकामा महिला शिक्षक धेरै हुनुहुन्छ, सुत्केरी हुँदाको बखत उहाँहरूले तीन महिना बिदा पाउने प्रावधान छ,’ पोखरेल भन्छन्, ‘तीन महिनासम्म शिक्षक नहुँदा पढाइ प्रभावित वन्ने भयो, त्यसैले यस्तो व्यवस्था गरिएको हो ।’

बिदाका लागि महिला शिक्षकले विद्यालयलाई जानकारी गराएपछि विद्यालयले नगरपालिकाको शिक्षा शाखालाई शिक्षक माग गर्ने व्यवस्था मिलाइएको छ । ‘विद्यालयले शिक्षक सुत्केरी बिदामा बसेको जानकारी गराएपछि सट्टामा शिक्षक खटाउँछौं,’ उनी भन्छन्, ‘कहिलेकाहीं सुत्केरी बिदा सकिएर शिक्षक हाजिरी हुने र सट्टामा पठाएका शिक्षकलाई अर्को विद्यालय पठाउनुपर्ने अवस्था नआए पढाइरहेको विद्यालय वा धेरै विद्यार्थी संख्या भएको विद्यालयमा आवश्यकताका आधारमा खटाउँछौं ।’

हाल नगरपालिकाको अनुदानमा अर्चना घिमिरे, बिना दुवाडी र सरिता देवकोटालाई करारमा नियुक्त गरी नगर क्षेत्रका सामुदायिक विद्यालयमा आवश्यकताका आधारमा खटाइएको छ । करारमा शिक्षक राख्न नगरपालिकाले नगर अनुदानमा सहयोगी शिक्षक व्यवस्थापन कार्यविधि २०८१ पनि बनाएको छ ।

करारमा नियुक्त शिक्षकलाई प्रसूति बिदा बसेको विद्यालय, शिक्षक विद्यार्थी अनुपात बढी भएको विद्यालय, कक्षागत तथा तहगत शिक्षक दरबन्दी नभएको विद्यालय र आन्तरिक आयस्रोत नभएको विद्यालयमा खटाइने कार्यविधिमा उल्लेख छ ।

विद्यालयको पठनपाठनलाई निरन्तरता दिन आवश्यक जनशक्ति व्यवस्थापन गर्ने, सामुदायिक विद्यालयको अंग्रेजी, गणित, विज्ञान, कम्प्युटर र नेपाली विषयमा शिक्षक अभावलाई आंशिक परिपूर्ति गर्न, विद्यालयको शैक्षिक व्यवस्थालाई सुधार ल्याउन तथा शैक्षिक गुणस्तर अभिवृद्धिमा सघाउ पुर्‍याउन सहयोगी शिक्षक राखिएको नगरपालिकाले जनाएको छ ।

प्रत्येक आर्थिक वर्ष नगर सभाबाट विनियोजित बजेटका आधारमा नगरपालिकाको अनुदान रकमबाट तलबभक्ता खाने गरी सहयोगी शिक्षक नियुक्ति गर्न नगर शिक्षा समितिले गरेको सिफारिसका आधारमा कार्यपालिकाले तह र विषय खुलाई कोटा निर्धारण गर्छ ।

पालुङटार नगरपालिकाको प्रशासकीय कार्यविधि (नियमित गर्ने) ऐन २०७५ को दफा ४ ले दिएको अधिकार प्रयोग गरी कार्यपालिकाले कार्यविधि बनाएको हो । सहयोगी शिक्षक राखेपछि सामुदायिक विद्यालयको पढाइ प्रभावित हुने समस्या टरेको नगरप्रमुख विवश चिन्तन बताउँछन् ।