संसद खुलाउने विषयमा छलफल गर्न सत्ता पक्ष र प्रतिपक्ष दलका शीर्ष नेताहरुको बैठक बस्दै छ ।
बैठक हिजो नै बस्ने भनिए पनि प्रमुख प्रतिपक्षी दल एमालेका अध्यक्ष केपी शर्मा ओली अनुपस्थित भए पछि आज बस्न लागेको हो ।
बिहान ११ बस्ने बैठकमा ६० किलो सुन तस्करीको छानबिनका लागि बनाइने भनिएको उच्चस्तरीय समितिको प्रारम्भिक मस्यौदा पेश गर्ने तयारी छ ।
हिजो सिंहदरबारमा बसेको प्रमुख तीन दलका नेताहरू सम्मिलित कार्यदलले सुन तस्करी छानबिनका लागि उच्चस्तरीय छानबिन समितिको मस्यौदा तयार पारेको थियो ।
कार्यदलमा एमालेका उपाध्यक्ष सुवासचन्द्र नेम्वाङ, नेपाली कांग्रेसका प्रमुख सचेतक रमेश लेखक र माओवादी केन्द्रका प्रमुख सचेतक हितराज पाण्डे हुनुहुन्छ ।
उच्चस्तरीय छानबिन समितिको माग गर्दै एमालेले संसद अवरुद्ध गरे पछि अस्ति प्रधानमन्त्री पुष्पकमल दाहाल प्रचण्डको आह्वानमा बसेको सत्ता साझेदार र प्रतिपक्षी दलका नेता सम्मिलित बैठकले उच्चस्तरीय समिति बनाउन सहमति गर्दै कार्यदल बनाएको थियो ।
यस पछि हिजो बैठक बसेर संसद खुलाउन सहमति गर्ने भनिएको थियो ।
साउन १० गतेदेखि सुन तस्करी प्रकरणमा उच्चस्तरीय छानबिन समितिको माग गर्दै प्रमुख प्रतिपक्षी दल नेकपा एमालेले सदन अवरुद्ध गर्दै आएको छ ।
यसबीचमा सदन खुलाउन प्रधानमन्त्री पुष्पकमल दाहाल प्रचण्डले एमाले अध्यक्ष केपी शर्मा ओली र कांग्रेस सभापति शेरबहादुर देउवासँग पटक–पटक छलफल गर्नु भएको छ ।
छलफल सकारात्मक भएकाले आज टुंगोमा पुग्ने नेताहरुले बताएका छन् ।
प्रतिनिधि सभाको बैठक आज दिउँसो ३ बजेका लागि बोलाइएको छ ।
