गोकर्णेश्वर नगरपालिका र नेपाल नेपाल अर्थोपेडिक अस्पताल बीच उपचार सम्झौता भएको छ । नागरिकलाई सुलभ रुपमा स्वास्थ्य उपचार गराउने सम्वन्धमा द्विपक्षिय सम्झौता भएको हो ।
सोमबार एक कार्यक्रमकाबीच नगर प्रमुख दिपक रिसाल , नगर उपप्रमुख सान्नानी लामा र नेपाल अर्थोपेडिक अस्पतालका प्रबन्ध निर्देशक डा.कैलाश कुमार भण्डारी बीच सम्झौता पत्र हस्तान्तरण भएको छ।
नगरपालिका र अस्पतालबीच सम्झौता पत्रमा हस्ताक्षर भएसँगै नागरिकले स्वास्थ्य उपचारमा छुट पाउने भएका छन् ।
विभिन्न बुँदा समावेश गरिएको सम्झौता पत्रमा हस्ताक्षर भने नगरपालिका प्रमुख प्रशासकीय अधिकृत बैकुण्ठ प्रसाद सापकोटा र अस्पतालका तर्फबाट निर्देशक डा।कैलाश कुमार भण्डारीले गरेका हुन ।
नगरपालिका तर्फको साक्षीका रुपमा मेयर दिपक रिसाल,उप-मेयर सान्नानी लामा रहेका छन् ,भने अस्पतालको तर्फबाट साक्षीका रुपमा अस्पतालका प्रमुख प्रशासकीय अधिकृत श्याम प्रसाद रुपाखेती र नेपाल अपाङ्ग संघका अध्यक्ष समेत रहेका साम्देन लामा रहेका छन् ।
अस्पतालसँग उपचार सम्झौता गर्ने कार्यक्रमको संयोजन गोकर्णेश्वर नगरपालिका वडा नं-६ का वडा अध्यक्ष लवराज लामाले गरेका थिए । नेपाल अर्थोपेडिक अस्पताल समेत सोहि वडामा रहेको छ ।
अस्पतालसँग उपचार सम्झौता भएसँगै जेष्ठ नागरिकले ३० प्रतिशत छुटमा उपचार गर्न पाउने भएका छन् । सम्झौता अनुसार गोकर्णेश्वरका नागरिकले शल्यक्रिया तथा बेड चार्जमा ३० प्रतिशत छुट पाउने भएका हुन् । छुटको २० प्रतिशत रकम नगरपालिकाले अस्पताललाई सोधभर्नाका रुपमा उपलब्ध गराउने छ ।
सम्झौता २०८० साल साउन १ गते देखी नै लागु भएको छ । सम्झौता अनुसारको छुट प्रति व्यक्ति वार्षिक रु १,००,००० (एक लाख) सम्मको उपचारमा लाग्ने रकम बराबर हुने र सो भन्दा वढि खर्च लाग्ने भएमा उक्त खर्च सम्बन्धित विरामी स्वयंले नै व्यहोर्नु पर्ने सम्झौता पत्रमा उल्लेख गरिएको छ।
नेपाल अर्थोपेडिक अस्पताल गैर नाफामुलक अस्पताल भएकाले कम खर्चमा गुणस्तरीय सेवा मार्फत विरामीको उपचार गर्न अस्पताल सधैं तत्पर रहेको अस्पतालका प्रबन्ध निर्देशक डा.कैलाश कुमार भण्डारीले बताए । उनले नगरपालिका र अस्पताको संयुक्त सहकार्यमा भविष्यमा समेत मिलेर काम गर्ने बताएका छन् ।
