काठमाडौंको तारकेश्वरमा ४ जनाको शव फेला परेको छ। तारकेश्वर नगरपालिका काभ्रेस्थलीमा श्रीमान–श्रीमती र दुई छोराछोरीको शव फेला परेको प्रहरीले जनाएको छ ।
प्रहरीका अनुसार १३ वर्षकी छोरी र ८ वर्षका छोरासमेतको शव भेटिएको छ । उनीहरू बिहान अबेरसम्म नउठेपछि स्थानीयले घरको ढोका फोडेका थिए। घटनामा ४१ वर्षीय दिनेश पाण्डे, उनकी श्रीमती ३९ वर्षीया सुनिता पाण्डे, १३ वर्षीया छोरी आशिका र ८ वर्षीय छोरा आशिक मृत्त भेटिएका थिए।
अहिले घटनास्थलमा काठमाडौं प्रहरी परिसरका प्रहरी उपरीक्षक, प्रहरी वृत्त बालाजु र काठमाडौं उपत्यका अपराध अनुसन्धानको टोली घटनास्थलमा पुगेको छ ।
श्रीमती दुई दिनपछि युके जाने तयारीमा रहेको स्थानीयहरूले बताएको उनको भनाइ छ। उनीहरुको पुर्ख्यौली घर गोरखा भए पनि अहिले त्यही घर बनाएर बस्दै आएको उनले बताए। थप अनुसन्धानपछि नै घटनाबारे थाहा लाग्ने प्रहरीले बताएको छ ।
