राष्ट्रिय प्रजातन्त्र पार्टीले काठमाडौँ क्षेत्र नम्बर २ मा आउँदो प्रतिनिधि सभा निर्वाचनका लागि कुन्तीदेवी पोखरेललाई युवा उम्मेदवार बनाएर अघि सारेको छ । समाजसेवा गर्दै राजनीतिमा आएकी युवा उम्मेदवार पोखरेलसँग समसामयिक विषयमा गरिएको कुराकानी :

काठमाडौँ क्षेत्र नम्बर २ मा प्रतिनिधि सभा सदस्यमा राप्रपाको तर्फबाट उम्मेदवार बन्नुभएको छ, तपाईंको उम्मेदवारी किन ?

राप्रपाको तर्फबाट म प्रतिनिधिसभा उम्मेदवार बनेकी छु । पार्टीले मलाइ विश्वास गरेर यो अवसर दिएको छ । म सक्षम युवा उद्यमी हुँ । देशको राजनैतिक दुरावस्था र व्याप्त भ्रष्टाचार, बेथिति, माफियातन्त्र, दलालतन्त्र, गरिबी, बेरोजगारी समस्या, युवा पलायन लगायत आम समस्या देखेपछि त्यसको समाधानको पहलका लागि म राजनीतिमा होमिन बाध्य भएको छु ।

नेपाली राजनीतिमा जबरजस्त युवा र सक्षम नेतृत्वको हस्तक्षेप जरुरी छ । देशमा हामी परिवर्तन, सुशासन खोजिरहेका छौ तर हामीले सही जनप्रतिनिधि चुन्ने मौकामा पटक पटक चुकेका छौँ । समय गतिशील छ तर हामी पुरानै नेतालाई विश्वास गरेर पटक पटक ठगिएका छौ । अब आफै अग्रसर भएर यो फोहोरी राजनीति सफा गर्न भ्रष्टाचार विरुद्धको जुन लिएर युवा जोस सहित म यो निर्वाचनमा उम्मेदवार बनेको छु । मेरो उम्मेदवारी नीति निर्माण तहमै सशक्त भूमिका खेल्नका लागि हो ।

तपाईंले यस क्षेत्रबाट जित्ने आधार के के हुन् ?

पहिलो आधार भनेको अहिले जनतामा आएको परिवर्तनको चाहाना हो । जनताहरू पुराना र भ्रष्ट पार्टीहरूबाट आजित छन् । जनता स्वच्छ राजनीति गर्न सक्ने सक्षम नेतृत्वको विकल्पको खोजीमा छन् । जनतामा आएको यो परिवर्तनको लहर नै मैले जित्ने मुख्य आधार हो । दोस्रो हामी सनातन धर्म र मौलिक संस्कृतिको रक्षाका लागि प्रतिबद्ध छौ । यो कुरा काठमाडौँ-२ का जनताले बुझ्नुभएको छ । यस क्षेत्रमा राप्रपाको राम्रो प्रभाव पनि छ । तेस्रो म एक युवा उद्यमी हुँ, यस क्षेत्रमा लामो समय देखि सामाजिक कार्यमा संलग्न छु । म यस क्षेत्रको माटोमा भिजेको छु, स्थानीय स्तरमा मेरो राम्रो प्रभाव छ, म यस कारण ढुक्क छु यो क्षेत्रका जनताले मलाई उहाँहरूको सेवा गर्ने मौका दिनुहुन्छ ।

तपाईंको पार्टीले हिन्दु राष्ट्रको मागलाई प्रमुख एजेण्डाको रूपमा लिएको छ । के तपाईंले हिन्दु धर्मको सेन्टिमेन्टमा मत पाउने आशा राख्नुभएको छ ?

हाम्रो पार्टी सनातन धर्म संस्कृतिप्रति प्रतिबद्ध छ । हामी नेपालमा भएका हिन्दुहरूको भावना अनुसार देशमा धर्मको रक्षा गर्न चाहन्छौँ । हाम्रो धर्म संस्कृतिको रक्षाका लागि पक्कै पनि जनताले यसपटक राप्रपालाई नै भोट दिनुहुन्छ । क्षेत्र नम्बर २ मा भएका मठ मन्दिर, गुठी , नेवाः संस्कृति सबैको संरक्षण गर्न, संसद्मा सनातन धर्मको रक्षाका लागि बुलन्द आवाज उठाउन मलाई जनताले मत दिनुहुन्छ भन्ने कुरामा विश्वस्त छु ।

यो निर्वाचन क्षेत्रमा राप्रपाको अन्य दलसँग तालमेल हुने अवस्था छ कि छैन ?

अहिले घोषित रूपमा त कुनै दलसँग हाम्रो तालमेल भएको छैन । अन्तिम समयसम्म हामीले त्यसका लागि प्रयास जारी राख्नेछौँ । हामी यो विश्वास गर्दछौ कि, हाम्रो क्षेत्रमा हामी बलियो दावेदार हौँ । चुनाव जित्नेमा हामी ढुक्क छौँ ।

तपाई मतदाता समक्ष के कस्ता एजेण्डा लिएर जाँदै हुनुहुन्छ ?

मेरो प्रमुख एजेण्डा भनेको त भ्रष्टाचारीलाई मृत्युदण्ड दिने कानुन निर्माण गर्न व्यापक दबाब र पहल गर्ने नै हुनेछ । त्यो सँग–सँगै नीति निर्माण तहमा सशक्त युवा आवाज बुलन्द गर्न, सनातन धर्म र मौलिक संस्कृतिको रक्षाका लागि कानुन निर्माण गर्न संसद्मा सशक्त आवाज उठाई कानुन निर्माण गर्न दबाब दिन , रोजगारी सृजना , युवा पलायन रोक्ने, भ्रष्टाचार न्यूनीकरण र उन्मुलन गर्नका लागि कडा भन्दा कडा कानुन निर्माणका लागि पहल गर्न, काठमाडौँ क्षेत्र नम्बर २ मा पर्ने कोटेश्वर, सिनामंगल, जडिबुटी, पेप्सीकोला साँखु बजार लगायत शहरी क्षेत्रमा भित्री सडक, ढल, ट्राफिकको समस्या र अव्यवस्थित आवासको समस्या समाधान गर्न काठमाडौँ महानगरपालिका र अन्य सम्बन्धित निकायसँग समन्वय र सहकार्य गर्दै व्यवस्थित सहरीकरण गर्ने लगायतका मेरा प्रमुख एजेण्डा हुन् । समग्रमा यो क्षेत्रको दुर्गम स्थानमा रहेको नाङ्लेभारेदेखि कोटेश्वरसम्मको समग्र विकासका लागि निरन्तर पहलकदमी गर्नेछु ।

अन्त्यमा के भन्न चाहनुहुन्छ ?

जनताले चाहेको परिवर्तन सम्भव छ, त्यसका लागि हाम्रो एक–एक मतको महत्त्व छ । हामीले भ्रष्ट र दलाल नेताहरूलाई गाली गरेर मात्र भन्दा पनि निर्वाचन मार्फत आफ्नो अमूल्य मतले उनीहरूलाई सजाय दिने बेला आएको छ । हाम्रो अमूल्य मतले देशको भविष्य निर्माण हुने हो । त्यसैले म आम मतदातालाई आग्रह गर्न चाहन्छु कि, यो अमूल्य अवसर मतदाताहरूले सही रूपमा सदुपयोग गर्न यसपटक हलोमा भोट हाली युवा र सक्षम जनप्रितिनिधिलाई निर्वाचित गर्नुहोस् । म क्षेत्रबाट निर्वाचित भएर क्षेत्र नम्बर २ का मतदाताहरूलाई सेवा गर्ने र संघीय संसद्मा सशक्त भूमिका खेल्ने जिम्मेवारी गहन रूपमा पुरा गर्ने प्रतिज्ञा व्यक्त गर्दछु ।