झापामा तीनजना किशोरी एउटै रुखमा झुन्डिएको अवस्थामा मृत भेटिएका छन् । झापाको कचनकवल गाउँपालिका ५ स्थित पाठामारीको बेल्लेगाउँस्थित सुनकोसी चिया बगानको बयरको रुखमा झुन्डिएर स्थानीय तीन किशोरीले सामूहिक आत्महत्या गरेका हुन् ।
दुईजना एउटै हाँगामा र अर्की अर्को हाँगामा झुन्डिएको अवस्थामा भेटिएका छन् । झिङ खोलाको किनारमा रहेको रुखमा झुन्डिएको अवस्थामा भेटिएको प्रहरीको भनाई छ । अत्महत्या गर्नेहरुमा १६ र १७ वर्षका किशोरीहरु रहेका छन् । सामूहिक आत्महत्या गर्नेहरूमा कचनकवल ५ निवासी पंचम गणेशकी १६ वर्षीया छोरी करिना, पुवालु गणेशकी १७ वर्षीया छोरी अञ्जली र बिरबल गणेशकी १६ वर्षीया छोरी कल्पना छन् ।
प्रहरीका अनुसार एकजनाले गाई बाँध्ने दाम्लो , अर्कीले प्लाष्टिकको डोरी र अर्कीले गम्छा प्रयोग गरेका छन् । उनीहरू आइतबार बिहान साढे ७ बजे सामूहिक झुन्डिएको अवस्थामा स्थानीयले फेला पारेपछि प्रहरीलाई खबर गरेका थिए ।
तीनैजना किशोरी चिया बगानमा काम गर्ने गरेका थिए । आफैंले काम गर्ने बगानमा उनीहरु झुन्डिएको अवस्थामा फेला परेका हुन् । तीनै जना शनिबार दिउँसो घुम्न भनी घरबाट हिँडेका थिए । सामूहिक आत्महत्याको कारण भने खुलेको छैन । यो घटनाले गाउँ नै शोकमा डुबेको छ ।
