ताप्लेजुङमा १४ सय परिवार अन्धकारमा बाच्न बाध्य भएका छन्। ताप्लेजुङको छुट्टाछुट्टै दुई ठाउँमा रहेको विद्युत आयोजनामा पहिरोले क्षति पुर्याएपछि करिव १४ सय परिवार अन्धकारमा बस्न बाध्य भएका हुन्।
विद्युत् आयोजनामा क्षति पुगेपछि जिल्लाको सिरिजङ्घा गाउँपालिकाका दुई र फक्ताङ्लुङ गाउँपालिकाका दुईवटा वडाका बासिन्दा अन्धकारमा बस्न बाध्य भएका हुन्।
सिरिजङ्घा गाउँपालिका–५ पेदाङ र वडा नम्बर ६ मामाङ्खे तथा फक्ताङ्लुङ गाउँपालिका–१ सावादिन र वडा नम्बर २ खेजेनिमका बासिन्दा अहिले अन्धकारमा बस्न बाध्य भएका छन्। ७० किलोवाट क्षमताको स्थानीय खाक्सेवा खोला लघु जलविद्युत् आयोजनालाई पहिरोले क्षति पुर्याएपछि गाउँ अन्धकारमय भएको बताइएको छ।
दुईवटा वडा अर्थात पेदाङ र मामाङ्खेका करिव सातसय परिवार अहिले बिजुली बत्ती उपभोग गर्नबाट बञ्चित भएका हुन्। खाक्सेवा खोला लघु जलविद्युत् आयोजनाको विद्युत् गृह (पावर हाउस) लाई पहिरोले क्षतिग्रस्त बनाएपछि विद्युत् सेवा अवरुद्ध बनेको हो।
यस्तै फक्ताङ्लुङ गाउँपालिकास्थित ६५ किलोवाट क्षमताको मेथेमखोला लघु जलविद्युत आयोजनालाई पहिरोले क्षति पुर्याउँदा सावादिन र खेजेनिमका करिव सातसय परिवार अन्धकारमा बस्न बाध्य छन्। एकसाता अघिदेखि दुईवटा वडाका उपभोक्ता बिजुली बत्ती उपभोग गर्नबाट वञ्चित हुँदै आएका बताइएको छ।
