गर्मी छल्न पानीको छालसँग लुकामारी गर्न सिन्धुपाल्चोकको सुकुटेमा आन्तरिक पर्यटक बढ्न थालेका छन् । तराई र काठमाडौंलगायतका जिल्लाको गर्मी छल्न भोटेकोशी र सुनकोशी नदी किनारको चिसो हावा, र्याफ्टिङ र स्विमिङ पुलमा गर्मी छल्न हजारौंको सख्यामा आन्तरिक पर्यटक पुग्ने गरेका छन् ।
भोटेकोशी र सुनकोशी तीरमा रहेको सुकुटे क्षेत्र आन्तरिक पर्यटकको रोजाइ बन्न थालेको छ । यहाँका अधिकांश होटल अहिले भरिभराउ छन् । अन्य दिनको तुलनामा शनिबार बढी पर्यटकको भीड लाग्ने गर्छ । स्विमिङ र भोटेकोशी नदीको र्याफ्टिङ पर्यटकको मुख्य रोजाइ बन्ने गरेको छ । अहिले गर्मी छल्न दैनिक तीन हजार २ सय आन्तरिक पर्यटक सुकुटे पुग्ने गर्छन् ।
६७ किलोमिटरको दूरीमा पर्ने सुकुटेको र्याफ्टिङ काठमाडौंबाट नजिक भएर पनि चर्चित छ । दैनिक एक होटलबाट एक हजारभन्दा बढीले र्याफ्टिङ गर्ने र्याफ्टिङ सञ्चालक बताउँछन् । सुकुटे वरिपरिको पहाडको दृश्य, पहाडको विचबाट झरेको सा साना झरना, नदी वरिपरीको दृश्यावलोकन गर्दै सेल्फी खिचेर पर्यटक रमाउने गरेका छन् । गर्मीसागै सुकुटेमा आन्तरिक पर्यटक बाक्लिन थालेपछि पर्यटकीय गन्तव्यहरु रुपमा सुकुटे चम्किन थालेका छन् ।
