पूर्वप्रधानमन्त्री डा. बाबुराम भट्टराईकी छोरी मानुषी यमी भट्टराईले काठमाडौंबाट चुनाव लड्ने भएकी छन् । जनता समाजवादी पार्टीका संघीय परिषद अध्यक्षसमेत रहेका डा.भट्टराईकी छोरी आउँदो आम निर्वाचनमा काठमाडौंबाट उम्मेदवार बन्ने भएकी हुन् ।
मानुषी जसपाको केन्द्रीय सदस्यसमेत रहेकी छन् । मानुषी काठमाडौं क्षेत्र नम्बर ५ वा ७ मध्ये एउटा क्षेत्रबाट प्रतिनिधिसभा निर्वचनमा उम्मेदवार बन्ने भएकी हुन्। क्षेत्र नम्बर निश्चित गरेसँगै चुनावी अभियान सुरु गरिहाल्ने उनको तयारी छ ।
यस्तै काठमाडौं क्षेत्र नम्बर ५ मा बाम गठबन्धनबाट एमालेका ईश्वर पोखरेल २३ हजार २९ मत पाएर विजयी भएका थिए भने काठमाडौं क्षेत्र नम्बर ७ मा पनि बाम गठबन्धनबाट एमालेका रामवीर मानन्ध विजयी भएका थिए ।
यसअघि २०६४ सालको संविधानसभा निर्वाचनमा तत्कालिन नेकपा माओवादीकी नेता तथा मानुषीकी आमा हिसिला यमी काठमाडौं क्षेत्र नम्बर ७ बाट निर्वाचित भएकी थिइन् । तर २०७० सालको संविधानसभामा सोही क्षेत्रमा पराजित भएकी थिइन् ।
मानुषीका बाबु डा. बाबुराम भट्टराई भने २०६४ र २०७४ को निर्र्वाचनमा गोरखा क्षेत्र नम्बर २ बाट निर्वाचित भए भने २०७० सालमा गोरखा क्षेत्र नम्बर १ बाट निर्वाचित भएका थिए ।
