सुनसरीको धरान उपमहानगरपालिकाका मेयेर हर्क सम्पाङ अल्पमतमा परेका छन् । धरानबाट स्वतन्त्र उमेदवारको रुपमा बिजयी भएका मेयर हर्क सम्पाङ नगरसभा र कार्यपालिकामा एमालेले हस्तक्षेप गरेपछि अल्पमतमा परेका हुन् । धरानमा १०२ जनप्रतिनिधि निर्वाचित भएका छन् । वैशाख ३० गते सम्पन्न स्थानीय तह निर्वाचनबाट धरानवासीले आगामी पाँच वर्षका लागि १०२ जना जनप्रतिनिधि छानेका हुन् । मेयरमा स्वतन्त्र उम्मेदवार हर्कराज राई (साम्पाङ) २० हजार ८२१ मत ल्याए निर्वाचित हुँदा उपमेयरमा माओवादी केन्द्रका अइन्द्र विक्रम बेघा विजयी भएका हुन् ।
गएको पाँच वर्ष धरानको नेतृत्व एमाले र काँग्रेसको हातमा थियो । ०७४ को निर्वाचनमा मेयर–उपमेयर र बहुमत वडा एमालेको कब्जामा थिए । तत्कालीन मेयर तारा सुब्बाको निधनपछि ०७६ मा भएको उपनिर्वाचनबाट धरानको नेतृत्व काँग्रेसको हातमा पुग्यो । उपनिर्वाचनमा काँग्रेसका तिलक राई २६ हजार ७०९ मत ल्याएर निर्वाचित भएका थिए ।
तत्कालीन नेकपा९ एमाले र माओवादी० प्रकाश राई २३ हजार ९१४ मत मात्र पाएका थिए । संघीय लोकतान्त्रिक राष्ट्रिय मञ्चकाम अम्बर बहादुर लिम्बुले ११३१ मत ल्याउँदा जसपाका गजेन्द्र बहादुर लिम्बुले ७५५ मत पाएका थिए । स्वतन्त्र उम्मेदवार हर्कराज राई साम्पाङ ४२२ मत पाएर चौंथो भएका थिए । उपनिर्वाचनमा बलशाली नेकपाका उम्मेदवारलाई पराजित गरेर ललाकिल्ला भत्काएको काँग्रेसले अहिले बलशाली गठबन्धनको साथ पाउँदा पनि मेयर गुमायो ।
उपनिर्वाचनमा ४२२
मत पाएका साम्पाङले गठबन्धनका उम्मेदवार किशोर राईलाई ४ हजार ७ सय ६२ मतले पछारिदिए । काँग्रेसले एक्लै लड्दा तिलकले २६ हजार ७०९ मत पाउँदा गठबन्धनको साथ पाएको किशोर १६ हजार ५९ मतमा सीमित भए । एमाले उम्मेदवार मञ्जु भण्डारी (सुवेदी) ले १२ हजार ८२५ मत मात्र पाइन् । प्रमुख कार्यकारी पद (मेयर– उपमेयर) नभएपनि नगरसभा र कार्यपालिकामा एमालेको एकल बहुमत छ । मेयर र उपमेयर गुमाएको एमालेबाट १०२ सदस्यीय नगरसभामा १० वडाध्यक्ष र ४६ सदस्य गरी ५६ सदस्य छन् । नगरसभामा ४५ प्रतिशत एमालेको उपस्थिति छ । ७ वडाध्यक्ष र ३० जना वडा सदस्य रहेको काँग्रेसले नगर सभामा ३६ प्रतिशत प्रतिनिधित्व राख्छ ।
यस्तै माओवादीबाट उपमेयरसहित ५ प्रतिशत उपस्थिति छ भने राप्रपा र स्वतन्त्र गरी करिब २ प्रतिशत प्रतिनिधित्व छ । ३४ जना पदेन मध्ये कार्यपालिकामा एकल बहुमत कसैको छैन । तर नगरसभामा एकल बहुमत भएको एमाले थप सदस्य चयनमा पनि हाबी हुने छ ।
नगरभित्रका सबै वडाध्यक्ष नगर कार्यपालिकाका स्वतः सदस्य हुने कानुनी प्रावधान छ । सो नगरको नगरसभाले महिला वडा सदस्यबाट पाँच जना र सोही नगरपालिकामा बसोबास गर्ने दलित वा अल्पसङ्ख्यक समुदायबाट तीन जना निर्वाचित गरेपछि नगर कार्यपालिकाले पूर्णता पाउँछ ।
उपमहानरको एक प्रमुख, एक उपप्रमुख, २० वडाका अध्यक्ष (सदस्य)पाँच महिला सदस्य र तीन दलित वा अल्पसङ्ख्यक सदस्य गरी जम्मा २७ सदस्य हुन्छ । नगरसभामा एमालेको बहुमत भएकोले थप कार्यपालिका सदस्य पनि एमालेकै हुने निश्चित छ । मेयर साम्पाङलाई एमालेको साथ विना काम गर्न कठिन छ ।
