काठमाडौँ — सर्वोच्च अदालतको न्यायाधीशमा न्याय परिषद्ले सिफारिस गरेका तिलप्रसाद श्रेष्ठको संसदीय सुनुवाइ जारी छ । संसदीय सुनुवाइ समितिको मंगलबारको बैठकमा न्यायाधीशमा सिफरिस श्रेष्ठको सुनुवाइ भइरहेको हो ।
न्यायाधीशमा सिफारिस श्रेष्ठविरुद्ध संसदीय सुनुवाइ समितिले १० दिनको समय राखेर यसअघि सार्वजनिक उजुरी आह्वान गरेको थियो । तर, उनीविरुद्ध एउटा पनि उजुरी नपरेको समिति सभापति लक्ष्मणलाल कर्णले जानकारी दिए । सर्वोच्चको न्यायाधीशमा सिफारिसमध्ये २०७४ यता सम्भवतः संसदीय सुनवाइ समितिमा उजुरी नपरेको श्रेष्ठ पहिलो भएको समितिले जनाएको छ ।
संसदीय सुनुवाइका क्रममा न्यायाधीशमा सिफारिस श्रेष्ठले सुनुवाइ समितिले स्वीकृत गरेमा आफू कान्छो न्यायाधीशका रूपमा सर्वोच्च जाने बताए । उनले मुद्दाको सुनुवाइमा इमानदार प्रयास रहने बताए । ‘वास्तविक न्यायाधीश उसको नियुक्तिले हैन आचरण र व्यवहारले हुने हो । न्यायाधीश समाजमा रोल मोडेल हुनुपर्छ भन्नेमा विश्वास राख्छु । न्यायव्रता न्यायाधीश हुनुपर्ने कुराको मूलभूत रूपमा ख्याल गर्नुपर्छ,’ उनले भने, ‘कानुनरुपी हतियारको प्रयोग सिर्जनात्मक रूपमा गर्नुपर्छ भन्ने मेरो मान्यता रहेको छ । स्वच्छता र निष्पक्षता नै न्यायाधीशको व्यवहार हुनुपर्छ ।’
सर्वोच्चमा नियुक्त भइसकेपछि आफूले प्रधानन्यायाधीश र सिनियर न्यायाधीशले दिएको भूमिका निर्वाह गर्ने बताए ।अदालतलाई राजनीतिक मात्रै होइन आर्थिक र प्रशासनिक स्वतन्त्रता दिनुपर्ने बेला आएको पनि न्यायाधीशमा सिफारिस श्रेष्ठले बताए । बारसँगको सम्बन्ध सुधार गर्नुपर्ने र न्यायपालिकामा देखिएका समस्या समाधानमा लाग्नुपर्न उनको सुझाव थियो ।
