तनहुँ जिल्ला अदालतमा अभिनेता पल शाह (पुर्णविक्रम शाह) विरुद्धको मुद्दा दर्ता भएको छ । मंगलबार दिउँसो तनहुँ जिल्ला सरकारी वकिल कार्यालयले अदालतमा अभियोगपत्र दर्ता गराएको हो । नाबालिग उमेरकी एक गायिकाले बलात्कार गरेको भन्दै उजुरी गरेपछि चर्चित अभिनेतासमेत रहेका शाह अहिले तनहुँ प्रहरीको हिरासतमा छन् । अभिनेता शाह विरुद्धको अभियोग अदालतमा दर्ता भइसकेको र आजबाटै थुनछेकको बयान समेत सुरु हुने शाहका वकिल भानु सुवेदीले बताए ।अभिनेता शाहको तर्फबाट नेपाल बार एशोसिएशन तनहुँका अध्यक्षसमेत रहेका अधिवक्ता भानु सुवेदी र वरिष्ठ अधिवक्ता कमलामोहन वाग्लेले बहस गर्ने भएका छन् । यस्तै, शाहविरुद्ध गत बिहीबार पूर्वीनवलपरासी जिल्ला अदालतमा बलात्कारको अभियोग पत्र दर्ता भइसकेको छ । पीडित नाबालिगले दुई ठाउँमा शाहविरुद्ध जाहेरी दिएकी थिइन् । तनहुँ जिल्ला अदालतमा थुनछेकको बहसपछि मात्र शाहको पूर्वी नवलपरासीको मुद्दाको प्रक्रिया अगाडि बढाउने तयारी भइरहेको छ । तनहुँ अदालतमा अभियोग पत्र दर्ता भएपछि अभियुक्त शाहको यहाँ बयान हुने र त्यसपछि थुनछेकको बहसपछि न्यायाधीशले पूर्पक्षका लागि थुनामा पठाउने तथा धरौटी वा साधारण तारेखमा छाड्नेमध्ये एक आदेश गर्नेछन् । तनहुँ अदालतले शाहलाई पुर्पक्षका लागि थुनामा पठाए पूर्वी नवलपरासी अदालतमा उनको बयान मात्र हुने र फैसलाको प्रक्रिया अगाडि बढ्न सक्ने बताइएको छ । पूर्वी नवलपरासी जिल्ला सरकारी वकिल कार्यालयले शाहविरुद्ध १२ देखि १४ वर्षसम्म कैद सजाय माग गर्दै अभियोग दर्ता गरेको छ ।
