This Week

पशुपतिनाथ मन्दिर परिसर र आसपासका क्षेत्रमा आजदेखि एक हप्तासम्म मासु तथा जाँड रक्सी उत्पादन, बिक्री, ओसारपसार, भण्डारण र खान नपाइने भएको छ ।

जिल्ला प्रशासन कार्यालय काठमाडौँले सूचना निकालेर गौशाला मित्रपार्क सडकदेखि पूर्व, पशुपति क्षेत्रको पूर्व सिमानादेखि पश्चिम, गौशाला तिलगंगा चक्रपथदेखि उत्तर, मित्रपार्क–उमाकुण्ड–गौरीघाट हुँदै गुहृयेश्वरीदेखि दक्षिणभित्रका सबै क्षेत्रमा यो नियम लागु भएको जनाएको छ ।

बालाचतुर्दशी पर्वलाई मध्यनजर गर्दै यी क्षेत्रमा आउँदो २७ गतेसम्मका लागि यो नियम लागू भएको जिल्ला प्रशासन कार्यालयले जनाएको छ । कोही कसैले यो सूचनाको बर्खिलाप हुने गरी कुनै काम गरेमा प्रचलित कानुन बमोजिम कारबाही हुने सूचनामा उल्लेख छ ।

गोकर्णेश्वर नगरपालिकाले २० औं महिला सामुदायिक स्वास्थ्य स्वयंसेविका दिवस २०८०को अवसरमा आयोजना गरेको सम्मान एवं बिदाई कार्यक्रम सम्पन्न भएको छ ।

मंगलबार गोकर्णेश्वर–९ स्थित सुनगाभा पार्टी प्यालेसमा भएको कार्यक्रममा ४ जनालाई सम्मानजनक बिदाई गरिएको थियो । वडाको सिफारिसको आधारमा १३ जना महिला सामुदायिक स्वास्थ्य स्वयंसेविकालाई सम्मान गरिएको थियो ।

यसैगरी, गोकर्णेश्वर नगरपालिका वडा नं. ३ का शान्ति लामा गोलेलाई मरणोपरान्त सम्मान गरिएको थियो । उहाँका श्रीमान लक्ष्मण गोलेलाई दोसल्ला ओडाएर सम्मानपत्र हस्तान्तरण गरिएको थियो ।

सम्मानजनक बिदाई पाउनुहुने स्वास्थ्य स्वयंसेविकाहरुमा वडा नं. १ बाट शोभा खत्री र कृष्ण कुमारी तामाङ, वडा नं. ५ बाट दुर्गा रानामगर (लक्ष्मी पुडासैनी) र वडा नं. ८ बाट विद्या रिसाल रहेका थिए । सम्मानजनक बिदाई पाउनुहुनेहरुलाई दोसल्ला ओडाएर जनही ३० हजार नगदका साथ सम्मानपत्र प्रदान गरिएको थियो ।

यसैगरी, सम्मानित हुने १३ जना महिला सामुदायिक स्वास्थ्य स्वयंसेविकालाई १० जना सम्मको लागि २ जना र ९ जनासम्म मात्र भएको वडाबाट १ जना सिफारिसको आधारमा सम्मान गरिएको थियो । उहाँहरुलाई जनही २५ सयका दरले नगद पुरस्कारसहित प्रमाणपत्र प्रदान गरिएको थियो ।

सम्मानित हुने १३ जना स्वास्थ्य स्वयंसेविकाहरुमा गोनपा १ बाट शर्मिला गुरुङ र भवानी खनाल, वडा नं. २ बाट शारदा श्रेष्ठ, सरस्वती पण्डित, वडा नं. ३ बाट गौरी कुमारी खत्री र दुर्गा विष्ट, वडा नं. ४ बाट सिन्धु पोखरेल र गीता आचार्य, गोनपा ५ बाट उमा ढुंगेल, वडा नं. ६ बाट जानुका खनाल, वडा नं. ७ बाट अनिता सापकोटा, वडा नं. ८ बाट रमा पोखरेल र वडा नं. ९ बाट सरस्वती मल्ल ठकुरी रहेका छन् ।

आज उपप्रमुख सान्नानी लामाको सभापतित्वमा भएको कार्यक्रम नगर प्रमुख दीपक रिसालको प्रमुख आतिथ्यतामा भएको थियो । कार्यक्रममा वडा अध्यक्षहरु जयराम महत, नन्दलाल श्रेष्ठ, गोनपा ३ का वडा सदस्य लक्ष्मी भण्डारी, प्रमुख प्रशासकीय अधिकृत टेकराज पन्थीको विशेष आतिथ्यता तथा आर्थिक प्रशासन शाखा प्रमुख रामजी रायमाझी, स्वास्थ्य शाखा प्रमुख हरि प्रसाद उपाध्याय लगायतको आतिथ्यता रहेको थियो ।

कार्यक्रमलाई सम्बोधन गर्नु हुँदै नगर प्रमुख रिसालले महिला स्वास्थ्य स्वयंसेविकाहरुको मेहनतकै कारण गोकर्णेश्वर नगरपालिका ७५१ पालिकाहरु मध्ये स्वास्थ्य सेवाको क्षेत्रमा उत्कृष्ठ भएको बताएका छन् । उनले नगरपालिकाले प्रदान गरेका स्वास्थ्य सेवा सुविधा लिन नगरवासीहरुलाई आग्रह गरेका छन् ।

उपप्रमुख लामाले स्वास्थ्य क्षेत्रको विकासमा सबैको हातेमालो आवश्यक रहेकोमा जोड दिनु हुँदै नेपालमा स्वास्थ्य स्वयंसेविकाको भूमिका अतुलनीय रहेको बताउकी छन्।

प्रमुख प्रशासकीय अधिकृत टेकराज पन्थीले महिला स्वास्थ्य स्वयंसेविकाको योगदानको चर्चा गर्नु हुँदै नगरपालिकाले स्वयंसेविकाको पक्षमा नयाँ योजना कार्यक्रम ल्याएर प्रोत्साहन दिने बताएका छन्।

वडा अध्यक्ष नन्दलाल श्रेष्ठले महिला स्वाथ्य स्वयंसेविकाको भूमिकालाई जति प्रशंसा गरे पनि कम हुने बताए । कार्यक्रम सञ्चालन जनस्वास्थ्य प्रवद्धर्न उपशाखाका अधिकृत पूर्ण बहादुर बस्नेतले गरेका थिए।

सुनको भाउ आज बुधवार पनि घटेको छ । नेपाल सुनचाँदी व्यवसायी महासङ्घका अनुसार सुनको भाउ तोलामा ८ सयले घटेर आज १ लाख १८ हजार ४ सय रुपैयाँमा कारोबार भइरहेको छ ।

सुनको भाउ हिजो मङ्गलवार पनि तोलामा २ हजार ४ सयले घटेर १ लाख १९ हजार २ सय रुपैयाँमा कारोबार भएको थियो । अस्ति सोमवार सुनको भाउ अहिलेसम्मकै उच्च तोलाको १ लाख २१ हजार ६ सय रुपैयाँ पुगेको थियो ।

आज चाँदीको भाउ पनि घटेको छ । हिजो तोलामा ४५ ले घटेर १ हजार ५ सयमा झरेको चाँदी आज २० रुपैयाँले घटेर १ हजार चार सय ८० रुपैयाँमा कारोबार भइरहेको महासङ्घले जनाएको छ ।

विवाहको सिजन भए पनि सुनचाँदीको कारोबार खासै नभएको व्यापारीले बताएका छन् । सिजनका बेला सुनको दैनिक माग ५० किलोसम्म हुने गरेकोमा अहिले कारोबार घटेको हो । पहिला हुने कारोबारको तुलनामा अहिले दैनिक १५/२० किलो मात्रै सुनको कारोबार हुँदै आएको छ ।

सुनको भाउमा उतारचढाव र आर्थिक मन्दीजस्ता कारणले कारोबारमा असर पारेको नेपाल सुनचाँदी व्यवसायी महासङ्घका अध्यक्ष माणिकरत्न शाक्यले बताएका छन् । उनका अनुसार भाउ महँगो हुँदा ग्राहकले आवश्यकताअनुसार नयाँ किन्ने भन्दा पनि आफूसँग भएको पुरानो गरगहनाबाट काम चलाउने गरेका छन् ।

रुकुम पश्चिमको चौरजहारी नगरपालिका–८ सोती गाउँमा अन्तरजातीय प्रेम सम्बन्धको विषयलाई लिएर नवराज विकसहित छ जनाको हत्यामा संलग्न रहेका २४ जनालाई जिल्ला अदालत रुकुम पश्चिमले जन्मकैदको फैसला सजाय सुनाएको छ ।

आज मङ्गलवार न्यायाधीश खड्कबहादुर केसीको इजलासले थुनामा रहेका २३ र तारेखमा रिहा भएका १ गरी २४ जनालाई जन्मकैदको फैसला सुनाएको हो । यस्तै अदालतले आठ जनालाई सफाइ दिएको छ । हत्या गरिएका नवराज विककी प्रेमिका, प्रेमिकाकी आमालाई अदालतले जातीय छुवाछुतमा दोषी ठहर गरेको छ । उनीहरूलाई दुई वर्ष कैद फैसला गरेको छ ।

२०७७ जेठ १० गते रुकुम पश्चिमको चौरजहारी नगरपालिका–८ सोती गाउँमा आफूभन्दा माथिल्लो जातकी युवतीसँग प्रेम गरेका भन्दै जाजरकोटका नवराज विक र उहाँका साथीहरू सन्दीप विश्वकर्मा, टीकाराम सुनार, गणेश बुढा, लोकेन्द्र सुनार र गोविन्द शाहीको ज्यान गएको थियो । उनीहरूको शव दुई हप्तासम्मको खोजीपछि भेरी नदी किनारबाट सङ्कलन गरिएको थियो । त्यस घटनामा १२ जना घाइते भएका थिए ।

यो घटनाको मुद्दामा गएको आइतवारदेखि अन्तिम सुनुवाइ शुरु भएकोमा आज अन्तिम आदेश आएको हो । दोषीहरूलाई जातीय छुवाछुतको कसुरमा थप दुई वर्ष कैद र ५० हजार रुपैयाँ जरिबानाको पनि फैसला भएको छ ।

नवराजका बुबा मुनलालको जाहेरीका आधारमा चौरजहारी–८ का तत्कालीन वडाध्यक्ष डम्बरबहादुर मल्लसहित ३४ जनाविरुद्ध मुद्दा चलेको थियो । उनीहरूमध्ये किशोरीकी आमा धरौटीमा र अरू १० जना सामान्य तारिखमा छुटेका थिए भने २३ जना पुर्पक्षका लागि कारागार चलान भएका थिए ।

रुकुम पश्चिमको चौरजहारी नगरपालिका–८ सोती गाउँमा अन्तरजातीय प्रेमसम्बन्धको विषयलाई लिएर नवराज विकसहित ६ जनाको हत्या भएको मुद्दामा अन्तिम सुनुवाइ सुरु भएको छ ।
साढे तीन वर्षअघि भएको घटनासँग सम्बन्धित कर्तव्य ज्यान र जातीय छुवाछूतको मुद्दामाथि रुकुम पश्चिम जिल्ला अदालतका न्यायाधीश खड्गबहादुर केसीको इजलासमा आइतबारदेखि अन्तिम सुनुवाइ सुरु भएको हो ।
उक्त मुद्दामा अब निरन्तर सुनुवाइ हुने अदालतका सूचना अधिकारी गोविन्द कोइरालाले बताए । उनका अनुसार आइतबार पहिलो दिन पीडित पक्षका तर्फबाट सरकारी वकिल र नौ जना कानुन व्यवसायीले बहस गरेका छन् । ‘वादी र प्रतिवादीका तर्फबाट अहिलेसम्म २४ जना वकिलले बहस गर्ने सूची छ । मुद्दाको फैसला आउन केही दिन लाग्न सक्छ,’ उनले भने ।

अदालतका अनुसार वादीतर्फ जिल्ला न्यायाधीशवक्ता चन्द्रबहादुर सिँजालीको नेतृत्वमा चार जना सरकारी वकिलले बहस गर्दै छन् भने पीडिततर्फ बहस गर्न वरिष्ठ अधिवक्ता दिनेश त्रिपाठीसहित १२ जनाले नाम टिपाएका छन् । त्यस्तै, प्रतिवादीतर्फ आठ जना वकिलले बहस गर्ने अदालतले जनाएको छ । दुवै पक्षको बहस सुनिसकेपछि मुद्दामा थप जाँचबुझ वा बुझ्नुपर्ने विषय नभए यही सुनुवाइबाट फैसला आउन सक्ने सूचना अधिकारी कोइरालाले बताए ।

अदालतभित्र अन्तिम सुनुवाइ सुरु हुँदा बाहिर भने पीडितहरूले न्याय माग्दै धर्ना थालेका छन् । शनिबार रातिदेखि नै अदालत परिसर पुगेका पीडित परिवार र अधिकारकर्मीले आइतबार बिहानैदेखि अदालतको गेटमा धर्ना दिँदै नाराबाजीसमेत गरेका थिए ।

२०७७ जेठ १० मा जाजरकोटको भेरी नगरपालिका–४ रानागाउँका २१ वर्षीय नवराज विक आफ्ना साथीहरू लिएर मल्ल थरकी प्रेमिकालाई भगाएर बिहे गर्न सोतीगाउँ पुगेका थिए । त्यहीबेला उनीहरूमाथि सोती गाउँका स्थानीयले योजनाबद्ध आक्रमण गर्दा नवराजसहित ६ जनाको ज्यान गएको थियो भने अरू १२ जना घाइते भएका थिए । उनीहरूको शव दुई सातासम्मको खोजीपछि भेरी नदी किनारबाट संकलन गरिएको थियो । घटनामा नवराजसहित उनका साथीहरू सन्दीप विश्वकर्मा, टीकाराम सुनार, गणेश बुढा, लोकेन्द्र सुनार र गोविन्द शाहीको ज्यान गएको थियो ।

नवराजका बुबा मुनलाल नेपालीको जाहेरीका आधारमा उक्त घटनामा चौरजहारी–८ का तत्कालीन वडाध्यक्ष डम्बरबहादुर मल्लसहित ३४ जनाविरुद्ध मुद्दा चलेको थियो । उनीहरूमध्ये १ जना (किशोरीकी आमा) धरौटीमा र अन्य १० जना सामान्य तारिखमा छुटेका थिए भने २३ जना पुर्पक्षका लागि कारागार चलान भएका थिए ।

६ जनाको हत्या गरी भेरी नदीमा फालेको अभियोगमा जिल्ला अदालतमा २०७७ जेठ ३२ मा मुद्दा दायर गरिएको थियो । ३३ जनालाई कर्तव्य ज्यान, ज्यान मार्ने उद्योग, जातीय भेदभाव र छुवाछूत कसुरको अभियोग छ भने एक जनालाई मतियारको अभियोग छ ।