नेपोलीको विजयसँगै डिएगो अर्मान्डो म्याराडोना रंगशालामा दर्शक उत्साही हुन पुगेका थिए । नेपोली नजिकको प्रतिद्वन्द्वी इन्टर मिलानभन्दा १ अंकले मात्र अगाडि रह्यो । इन्टरले कोमोमा २–० को जित हात पारेको थियो । मध्यान्तर हुनु ठिक अगाडि गोलरक्षक पेपे रैनाले रातो कार्ड सामना गरेपछि डिफेन्डिङ च्याम्पियन इन्टरले १० खेलाडीमा सीमित कोमाविरुद्ध खेल्न पाएको थियो । रैनाको आफ्नो खेलजीवनमा यो अन्तिम खेल पनि थियो ।

गत सिजन इन्टरले लिगको उपाधि जित्दा नेपोली १० औं स्थानमा थियो । ‘फेरि यो सम्भव भएको छ र यो उत्कृष्ट पनि रह्यो । यो सिजन हाम्रो निकै नै उत्कृष्ट रह्यो । यसका लागि सबै खेलाडीलाई धन्यबाद दिनुपर्छ । उनीहरूले निकै मिहिनेत गरेका छन् । विशेष गरी दुई वर्षअगाडि पनि लिग जित्ने खेलाडीहरूले निकै राम्रो खेले,’ नेपोलीका प्रशिक्षक एन्टोनियो कोन्टेले भने ।

उपाधि जिताए पनि कोन्टेले नेपोली छाड्न लागेको हल्ला चलिरहेको छ । क्लबका मालिक अउरेलियो डी लाउरेन्टिजले दिल खोलेर लगानी नगरेका कारण कोन्टेको गुनासो रहेको विभिन्न सञ्चारमाध्यममा जनाइएको छ । तर कोन्टे यसको खण्डन गर्छन् । ‘क्लबका मालिक र उनको परिवारसँग मेरो राम्रो सम्बन्ध छ,’ कोन्टेले भनेका छन्, ‘मैले उनलाई र उनले मलाई चिन्ने मौका पाएका छौं । हामी लिग उपाधि जितेको खुसी सँगै मनाउँदै छौं र हामी अलिक फरक भए पनि दुवै विजेता हौं ।’

म्याकटोमिनी र लुकाकु नेपोलीको नयाँ हिरो बनेर आए । स्कटल्यान्डका मिडफिल्डर म्याकटोमिनी प्लेयर अफ द सिजनमा चुनिए । मध्यान्तर हुनु उनले एक्रोब्याटिक भलीमा गरेको गोल यस सिजनको १२ औं थियो । कोमोमा स्टेफन डी भर्जले २१ औं मिनेटमा गरेको गोलमा इन्टरले अग्रता लिएको समयमा म्याकटोमिनीले नेपल्समा नेपोलीलाई अग्रता दिलाउँदै अंक तालिकामा शीर्षस्थानमा ल्याएका थिए ।

इन्टरको ध्यान अब शनिबार पेरिस सेन्ट जर्मेनविरुद्ध हुने च्याम्पियन्स लिग फाइनलमा रहनेछ ।