जनकपुरधामको रजौलस्थित निर्माणाधीन रामजानकी बहुउद्देश्यीय रंगशालामा मंगलबार भएको पहिलो खेलमा लखनऊले सिरहालाई ९ विकेटले र दोस्रो खेलमा पर्साले दिल्लीलाई ८ विकेटले पराजित गरेको हो ।

लखनऊले १२३ रनको लक्ष्य १४.२ ओभरमा एक विकेट गुमाउँदै पूरा गरेको हो । लखनऊका तर्फबाट प्रिथुल मेहताले अविजित रहँदै ५१ बलमा ६२ र सोमेन मोहेन्टीले ३० बलमा ५० रन बनाए । यस्तै, सुमित पाठकले ५ बलमा ५ रन बनाएर दिनेश अधिकारीको बलमा आउट भएका थिए ।

टस हारेर पहिले ब्याटिङ गरेको सिरहाले निर्धारित २० ओभरमा १२२ रन बनाउँदा सबै विकेट गुमाएको थियो । सिरहाको ब्याट्सम्यानले राम्रो प्रदर्शन गर्न नसक्दा लखनऊले लो स्कोर पाएको थियो । सिरहाबाट दिपेश दासले ३१ बलमा ३३ रन बनाएर रन आउट हुँदा दिनेश बुढा मगरले २०, अशोक यादवले १६, कृश अयरले १४, अशोक पौडेल १३, राकेश कामतले १०, प्रदीप पासवानले ५ रन बनाए ।

लखनऊका शैलेन्द्र सिंहले ३ विकेट लिँदा अशमित मिश्र, शिव सिंह र मनिश सिंहले समान १/१ विकेट लिए । ३० बलमा ५० रन बनाएर अविजित रहेका मोहेन्टी म्यान अफ द म्याच बने ।

यस्तै, दोस्रो खेलमा दिल्लीबाट ६० रनको लक्ष्य पाएको पर्साले ६.४ ओभरमा २ विकेट गुमाउँदै म्याच जितेको हो । पर्साको तर्फबाट इमरान शेखले २२ बलमा ३६ रन बनाएर आउट हुँदा सफवान अलीले १७ र सज्जद मन्सुरीले १ रन बनाएर अविजित रहे । पर्साबाट ओपनिङ ब्याटिङ गरेका मोहमद समीर शून्यमा आउट भएका थिए ।

दिल्लीबाट राहुल मौर्यले २.४ ओभरमा २५ रन दिएर २ विकेट लिँदा अन्य बलरले विकेट लिन सकेनन् । यसअघि टस जितेर पहिले ब्याटिङ गरको दिल्लीले १५.३ ओभर मात्र खेल्न सके । दिल्लीबाट राहुल मौर्यले ३० बलमा १२ रन र राज सहनीले ३१ बलमा ११ रन बनाउँदा बाँकी खेलाडीले दोहोरो अंकमा रन बनाउन सकेनन् ।

बलिङमा पर्साको तर्फबाट रञ्जित कुमारले उत्कृष्ट बलिङ गर्दै ४ ओभरमा ५ रन दिएर ३ विकेट लिए । यस्तै चन्दन रामले ३ ओभरमा ४ रन दिएर २ विकेट लिँदा राजा मन्सुरीले ३ ओभरमा ८ रन दिएर २ विकेट लिए । इमराश शेख र वसीम मन्सुरीले समान १।१ विकेट लिए । उत्कृष्ट बलिङ गरेका पर्साका रञ्जित म्यान अफ द म्याच भए ।