सीएनएनका अनुसार राष्ट्रपति पुटिनले सैन्य भर्तीसम्बन्धी एक आदेशमा हस्ताक्षर गरेका हुन् । उक्त आदेशअनुसार मंगलबारदेखि सुरू हुने सैनिक भर्ना प्रक्रिया १५ जुलाईसम्म चल्ने जनाइएको छ । आदेशअनुसार १८ देखि ३० वर्षसम्मका १ लाख ६० हजार रुसीलाई सैनिक सेवामा सामेल गराइनेछ ।

रुसी सरकारी समाचार संस्था तासका अनुसार गत वर्ष रुसले १० हजार नयाँ सैनिक भर्ना गरेको थियो । रुसी सेनाको आकार बढाउने राष्ट्रपति पुटिनको योजना अनुसार थप सैनिक भर्ना गर्न लागिएको तासले जनाएको छ । रुसमा तीन वर्ष अघि करिब १० लाख सैनिक थिए । हाल यो संख्या करिब ५ लाखले बढेको छ ।

रुसले तीन वर्षभन्दा लामो समयदेखि युक्रेनसँग युद्ध लडिरहेका बेला ठूलो संख्यामा सैनिक भर्ती गर्न लागिएको हो । पछिल्लो समय रुसले कुर्स्क क्षेत्रमा युक्रेनी फौजलाई विस्थापित गर्न उत्तर कोरियाली सैनिकहरूको भर परेको छ । दक्षिण कोरिया तथा अमेरिकाका अधिकारीका अनुसार उक्त क्षेत्रमा उत्तर कोरियाले पटकपटक गरी करिब १५ हजार सैनिक परिचालन गरिसकेको छ । तर तीमध्ये करिब ४ हजार उत्तर कोरियाली सैनिक मारिएका दक्षिण कोरियाली अधिकारीको दाबी छ ।

रुसी कानूनले अनिवार्य सेवाका लागि भर्ना गरिएका सैनिकलाई उचित तालिमबिना लडाइँ जारी रहेका क्षेत्रमा पठाउन निषेध गर्दछ । नयाँ भर्ना गरिएका सैनिकहरूलाई भने युक्रेनसँगको युद्धमा नखटाइने रुसी अधिकारीको दाबी छ । तर युक्रेन युद्धपछि भर्ना गरिएका सैनिकलाई हस्ताक्षर गर्न दबाब दिइएको वा भ्रमित गरिएको रिपोर्टहरू बाहिर आएका सीएनएनले जनाएको छ ।

पछिल्लो समय युक्रेन युद्ध अन्त्यका लागि अमेरिकी अधिकारीहरूले रुससँग छलफल गरिरहेका छन् । तर रुसी सेनाले दोनेत्स्क क्षेत्रको पोकरोभस्कमा निरन्तर आक्रमण जारी राखेका छन् । केही दिनयता भने रुसी फौजले युक्रेनी सहरमा हवाई आक्रमणसमेत तीव्र पारेका छन् ।

यसैबीच, वरिष्ठ रुसी वार्ताकार किरिल दिमित्रीभले यसै साता ट्रम्पका विशेषदूत स्टिभ विटकफसँग भेटवार्ता गर्न अमेरिका भ्रमण गर्ने अपेक्षा गरिएको छ । उनको भ्रमण सन् २०२२ मा रूसले युक्रेनमा आक्रमण गरेपछि वार्ताका लागि हुने लागेको पहिलो हो । यसअघि मस्को भ्रमण गरेका विटकफले रुसी राष्ट्रपति पुटिनसँग भेटवार्ता गरेका थिए ।

गत जनवरीमा अमेरिकामा डोनाल्ड ट्रम्पले राष्ट्रपति पद सम्हालेसँगै दुई देशबीचको सम्बन्धमा सुधार आएको ठानिएको छ । तर पछिल्लो समय भने युक्रेन युद्धमा युद्धविरामका लागि अमेरिकाले अघि सारेको प्रस्तावमा रुसको असहमति र ब्ल्याक सीमा युद्धविरामका लागि रुसले सर्त अघि सारेपछि भने ट्रम्प केही रुष्ट देखिएका छन् ।