सरकारले आजबाट ४० माइक्रोन भन्दा पातलो प्लास्टिकको झोला प्रयोगमा रोक लगाएको छ । प्लाष्टिकजन्य पदार्थबाट हुने वातावरणीय प्रदुषण न्यूनीकरण पातलो प्लाष्टिकको उत्पादन, आयात, विक्री वितरण र प्रयोगमा सरकारले रोक लगाएको हो ।
सरकारले प्लाष्टिकका झोला प्रतिवन्धको नीति तथा निर्णयलाई आगामी दिनमा थप कडाईका साथ लागुगर्ने तयारी गरेको भन्दै वातावरण विभाग ४० माईक्रोन भन्दा पातलो प्लाष्टिक झोला प्रयोग नगर्न आग्रह गरेको छ । उक्त झोला उत्पादन, आयात, बिक्री वितरण र प्रयोग गरेको भेटिएमा वातावरण संरक्षण ऐन, २०७६ र वातावरण संरक्षण नियमावली, २०७७ बमोजिम कारबाही गरिने विभागले चेतावनी दिएको छ ।
गत वर्ष साउन २८ मा सर्वोच्च अदालतले ४० माइक्रोनभन्दा कमका प्लास्टिक प्रतिबन्ध लगाउन अन्तरिम आदेश दिए लगत्तै मन्त्रालयले सो सम्बन्धी निर्णय गरी कार्यविधि तयार गरेको थियो । सोही निर्णयलाई कार्यान्वयन गर्न सरकारले ४० माइक्रोन भन्दा पातलो झोलामा आजबाट पूर्णप्रतिबन्ध लगाएको हो ।
