भारतको राजधानी दिल्लीमा एक आतंकवादी संगठनले विष्फोट गराइदिने धम्की दिएपछि पूरै सहरमा हाइअलर्ट जारी गरिएको छ । आतंकवादी संगठन तहरिक ए तालिबानले विष्फोट गराउने धम्की दिएको हो । सहरमा हाइअलर्ट जारी गरिएसँगै दिल्ली पुलिसले मंगलबार अबेर राती सरोजनी मार्केट समेत कैयौं बजारमा सर्च अपरेशन चलाएको छ ।
दिल्ली पुलिसको स्पेसल सेलका एक अधिकारीले बताए अनुसार तहरिक ए तालिबानको नामबाट केही व्यक्तिहरुलाई धम्कीपूर्ण इमेल पठाइएको छ । इमेलमा दिल्लीमा विष्फोट गराइदिने भनिएको छ । यी व्यक्तिहरुले उत्तर प्रदेश पुलिसलाई यी इमेलबारे जानकारी गराएका थिए । उत्तर प्रदेश पुलिसले तत्काल दिल्ली पुलिसलाई यसको जानकारी दियो ।
दिल्ली पुलिसले आक्रमणको इनपुट पाउनासाथ संवेदनशील स्थानहरुमा फोर्स बढाएको छ । सरोजिनी नगर मार्केटमा कैयौं घण्टाको सर्च अपरेशन चलेको छ । दिल्लीका केही अरु मार्केटमा पनि यस्तो किसिमको सर्च गरिएको बताइएको छ । सरोजिनी नगर मिनी मार्केट ट्रेडर्स एसोसिएसनका अध्यक्ष अशोक रंधावाका अनुसार सुरक्षा कारणले मार्केट बन्द राखिनेछ । उनले दिल्ली पुलिसले मार्केट बन्द गर्न आदेश दिएको बताए ।
धम्की दिने संगठन तहरिक ए तालिबानलाई पाकिस्तानको तालिबान पनि भनिन्छ । यसको स्थापना डिसेम्बर २००७ मा भएको थियो । अफगानिस्तान सीमा नजिकै पाकिस्तानको कबायली क्षेत्रमा यो संगठनको धेरै प्रभाव छ । यो संगठनको उद्देश्य पाकिस्तानमा शरियामा आधारित कट्टरपन्थी इस्लामी सरकार कायम गर्नु हो । यो संगठनले २०१४ मा पाकिस्तानको पेशावरमा सैनिक विद्यालय आक्रमण गरेर १३२ बालबालिका सहित १४९ जनालाई मारेको थियो ।
