वडाध्यक्षले चलाएको मोटरसाईकल ठक्करबाट उनकै वडाबासी पैदल यात्रीको मृत्यु भएको छ। त्रियुगा नगरपालिका ६ का वडाध्यक्ष निर्मलकुमार चौधरीले चलाएको मोटरसाईकलको ठक्करले सोही वडाका ५३ वर्षीय रामचन्द्र चौधरी (थारु)को मृत्यु भएको हो।
प्रहरीका अनुसार वडाध्यक्ष चौधरी सवार स १ ब ८९७ नं. को मोटरसाईलले अघिल्लो राति साढे ८ बजे गाईघाट–जलजले खण्डको कुमारी चोकमा पैदलयात्री थारुलाई ठक्कर दिएको थियो। ठक्करबाट घाइते भएका थारुको उपचारार्थ विराटनगर लाने क्रममा बाटैमा निधन भएको जिल्ला प्रहरी कार्यालय उदयपुरले जनाएको छ।
ठक्कर दिने वडाध्यक्ष चौधरी स्वयं पनि घाइते भएर विराटनगरमै उपचार भईरहेको छ। प्रहरी प्रशासनले घट्नालाई गम्भीर रुपमा नदिएको भन्दै मृतक परिवारका आफन्त र स्थानीयले कुमारी चोकमा बिहीबार केहीबेर यातायात अवरुद्ध गर्दा गाईघाट–कदमाहा सडक ठप्प भएको स्थानीय दिपक किरातीले बताए।
उनका अनुसार पीडकमाथि कानुनी कारबाही र उचित क्षतिपूर्तिको माग गर्दै करिव डेढ घण्टा चक्काजाम गर्दा यातायात अवरुद्ध हुन पुगेको थियो। जिल्ला प्रहरीले टोली खटाएर अवरुद्ध यातायात दिउँसोदेखि सुचारु गराएको किरातीले बताए। मृतकको शव पोष्टमार्टमका लागि जिल्ला अस्पताल उदयपुरमा राखिएको छ भने घटनाबारे अनुसन्धान सुरु गरेको प्रहरीले जनाएको छ।
स्थानीय र आफन्तले भने उचित क्षतिपूर्तिको व्यवस्था र पीडकमाथि कारबाहीको ग्यारेन्टी नभएसम्म शव नबुझ्ने अडान लिएको छ। यस विषयमा सहमति जुटाउन पीडित परिवार, प्रशासन, प्रहरी र जनप्रतिनिधि सँगै बसेर छलफल भइरहेको छ।
