२ फागुनका लागि बोलाइएको संसद बैठक ४ फागुन दिउँसो १ बजेका लागि सारिएको संघीय संसद सचिवालयका महासचिव डा. भरतराज गौतमले जानकारी दिए । संसद बैठक १८ माघयता पटक–पटक सर्दै आएको छ ।
सत्ता गठबन्धनका तीन दल कांग्रेस, माओवादी केन्द्र र एकीकृत समाजवादीले प्रधानन्यायाधीश चोलेन्द्रशमशेर जबराविरुद्ध महाअभियोग प्रस्ताव दर्ता गरेका छन् । आइतबार ९८ जना सांसदको हस्ताक्षरसहित कानुनमन्त्री दिलेन्द्रप्रसाद बडू, ऊर्जामन्त्री पम्फा भुसालसहितको टोली संसद सचिवालय पुगेर प्रधानन्यायाधीश जबराविरुद्ध महाभियोग प्रस्ताव दर्ता गरेका थिए ।
प्रधानन्यायाधीश जबराविरुद्ध महाभियोग प्रस्ताव दर्ता भएको केही समयमै संसद बैठक स्थगित भएको सूचना संसद सचिवालयले टाँस गरेको थियो । यसअघि बिहीबार प्रमुख प्रतिपक्षी दल एमालेले २ फागुनमा आफ्नो प्रदेशस्तरीय प्रशिक्षण कार्यक्रम रहेकाले संसद बैठक केही दिन पछि सार्न सभामुख अग्निप्रसाद सापकोटालाई आग्रह गरेको थियो ।
यसअघि १६ माघका लागि बोलाइएको संसद बैठक पनि सूचना टाँस गरी स्थगित गरी २६ माघका लागि सारिएको थियो । तर, २६ माघका लागि बोलाइएको बैठक पनि २ फागुनसम्मका लागि स्थगित भएको थियो । सत्ता गठबन्धनभित्रै अमेरिकी सहायता परियोजना एमसीसी संसदमा टेबुल गर्ने कि नगर्ने भन्नेमा विवाद पनि चर्किएको छ ।
