दोलखाका शैलुङ गाउँपालिकाले १४ किलोका मूला फलाउने किसानलाई सम्मान गरेको छ । गाउँपालिकाको वडा नं १ दुधपोखरी ठेकलघ्युका कृषक पदमबहादुर घिसिङलाई मंगलबार नगद सात हजारसहित सम्मान गरेका हुन् ।
गाउँपालिका अध्यक्ष भरतप्रसाद दुलालले कृषकलाई उत्पादनमा थप उत्साहित हुनाका लागि सम्मान गरिएको बताए ।
तामाङले धेरै वर्षदेखि अग्र्यानिक तरकारी खेती गर्दै आएका छन् । उनले मौसमअनुसारका खेती गर्ने गरेका छन् । यसरी लामो समयदेखि तरकारी खेती गर्दै आए पनि उनी पहिलो पटक चर्चामा आएका हुन् । आलु रोप्ने बारी तयार पारेर १४ किलोको मूला बोकेर उकालो चढ्दै गरेको तस्बिर खिचेर छोरा मीनबहादुरले फेसबुकमा पोस्ट गरेपछि उनी चर्चामा आएका हुन् ।
मूला बोकेको तस्बिर सामाजिक सञ्जालबाट सार्वजनिक भएपछि उनलाई गाउँपालिकाका अध्यक्षले फोन गरेर पालिकामा निम्तोसमेत दिए । उनी दुई वटा १४ केजीका मूला बोकेर मंगलबार पालिकाको कार्यालयमा पुगे । उनी र छोरो बाबुलाललाई पालिकाले १४ केजीको मूला फलाएको भनेर नगदसहित सम्मान गरेको हो । त्यसका साथै सिँचाइका लागि उनले ३ सय मिटर पाइप पाए ।
