विश्व हिन्दु महासंघ नेपाल राष्ट्रिय समिति जिल्ला शाखा काठमाडौंका सचिव राजु सुनारले राजिनामा दिएका छन् । समाजमा दलितको अवस्था प्रति संगठन संवेदनशिल नभएको भन्दै सुनारले सचिव पदबाट राजिनामा दिएका हुन् ।
आईतबार आफ्नो राजिनामा पत्र सामाजिक सञ्जालमा राख्दै सुनारले लेखेका छन् – ‘यो समाजमा दलित भएर जन्मनु भन्दा गोरु भयर जन्मनु बेस ! कमसेकम आत्मसम्मानको निम्ति सबै हिन्दुहरु बोल्ने रहेछौ !’ उनले विश्व हिन्दु महासंघ नेपाल राष्ट्रिय समिति र अगुवा नेताहरुबाट दलितको आत्मसम्मानका लागि काम हुन नसकेकोले आफू संगठनमा बस्न नसकेको बताए ।
उनले देशमा दलित समुदायमाथी ज्यादति, भेदभावका अमानवीय घटना बढिरहँदा, रुकुममा केही वर्ष पहिले नवराज विक लगायत ६ जनाको ज्यान जाने गरी भएको घटनाको विरोधमा हिन्दू अभियन्ताहरुको एकता र अग्रसरता नदेखिएको बताए । दलितको ज्यानै जाने जघन्य घटनालाई नदेखेझै गर्ने तर हालै धरानमा गोरु काटेर खाएको घटनाको विरोधमा देखिएको धापिर्मक संघसंगठन, अगुवाहरुको सक्रियताले आफूलाई चिन्तित बनाएको बौद्ध खबरलाई बताए । मान्छे मर्दा नबोल्ने अमानवीय र असंवेदनशील नेतृत्व, संगठनप्रति भत्सर्ना गर्दै आफूले राजिनामा दिएको बताए । आज गाईको विषय देशव्यापी बन्दा दलितमाथी सदियौं देखि भईरहेको अन्याय, अत्याचारका विषयमा किन मौनता रु उनले प्रश्न गरे ।
उनले गाईको विषयमा बोल्नुलाई आफूले नाजायज भन्न नखोजेको तर मान्छेमाथीको विभेदमा नबोल्ने संगठनमा बस्न नसक्ने भएकोले राजिनामा दिएको बताए । काठमाडौं जोरपाटीका स्थायीबासिन्दा सुनार नेपाली कांग्रेसका युवा नेता हुन् । विभिन्न सामाजिक क्षेत्रमा सक्रिय सुनार नेपाल दलित विद्यार्थी संघका केन्द्रीय अध्यक्ष समेत हुन् । सुनार जातीय भेदभावको अन्त्य तथा हिन्दू धर्म संस्कृतिको संरक्षणको अभियानमा लामो समयदेखि सक्रिय रहँदै आएका छन् ।
