गोकर्णेश्वर नगरपालिकाले कृर्षकलाई उन्नत जातका बोयर बोका वितरण गरेको छ ।
नगपालिकालाई पशु विकास र कृषि उत्पादनको पकेट क्षेत्र बनाउने नीति अनुरूप व्यावसायिक बाख्रापालनलाई उत्प्रेरित गर्न बोका वितरण गरिएको नगरपालिकाका प्रमुख प्रशासकीय अधिकृत बैकुण्ठ प्रसाद सापकोटाले बताएका छन् । नगरपालिकाको पशुसेवा कार्यालयले आह्वान गरेको प्रस्तावअनुसार नीतिगत मापदण्डभित्र परेका समूह,सहकारी र व्यक्तिगत फारामलाई शतप्रतिशत अनुदानमा बोका वितरण गरिएको सापकोटाले बताए । उनका अनुसार १० वटा बोयर बोका वितरण गरिएको छ ।
बोका वितरणको लक्ष्य परम्परागत बाख्रापालनलाई क्रमशः व्यावसायिक गर्दै लैजानु र उत्पादनलाई बढवा दिई कृषकको आर्थिक अवस्थालाई उकास्नु रहेको छ । नगरपालिकाले नश्ल सुधारमार्फत मासु उत्पादन वृद्धि गर्न किसानलाई अनुदानमा ‘बोयर’ जातका ब्याड बोका वितरण गरेको हो । बाख्रामा नश्ल सुधार गर्दै मासु उत्पादन वृद्धि गर्न सहयोग पुर्याउने उद्देश्यसहित व्यावसायिक बाख्रापालक किसानलाई उन्नत जातको व्याड बोका अघिल्लो आर्थिक वर्षमा पनि नगरले वितरण गरेको थियो ।
नगरपालिकालाई मासुमा आत्मनिर्भर बनाउनका लागि नश्ल सुधारमा जोड दिएको र व्यावसायिक रूपमा बाख्रापालन गर्दै आएका किसानलाई छनोट गरेर बोयर जातको ब्याड बोका वितरण गरेको हो ।
नगरपालिकाले मापदण्ड पूरा भएका १० वटा समुहमार्फत बोका वितरण गरेको छ । व्यावसायिक बाख्रा फार्म सञ्चालन गर्दै आएका किसानले विभिन्न मापदण्ड बनाएर ब्याड बोका पाल्नुपर्ने छ ।
नगरपालिकाले किसानको खोरमा बाख्रा भए नभएको घाँसको अवस्था कस्तो छ, बाख्रापालनका लागि खोरको बनावटलगायका सबै कुराको अध्ययन गरेर बोयर बोका उपलब्ध गराइएको हो । छनोटमा परेका किसानबाट नै समिति बनाएर समितिमार्फत नै बोयर बोका खरिद गरेर ल्याएर वितरण गरेको छ ।
किसानलाई अनुदानमा वितरण गरिएको बोयर जातको बोकाको अवस्थाका वारेमा नगरपालिकाले बेलाबेलामा अनुगमन समेत गर्ने छ ।
किसानलाई अनुदानमा उन्नत जातको बोका वितरण गर्दा कम्तीमा पाँच वर्षसम्म बिक्री वितरण गर्न नपाउने गरी सम्झौतासमेत भएको छ ।
