दाङको तुलसीपुर उपमहानगरपालिका वडा नं. ४ मा बाटोको नयाँ ट्रयाक खन्ने क्रममा एक कसौडी गाडेको धन फेला पार्ने जेसिबी चालक छुटेका छन्।
आवश्यक परेको खण्डमा हाजिर हुने गरी चौधरीलाई छोडिएको प्रहरीले जनाएको छ।
असार १ गते दिउँसो बाटो खन्ने क्रममा तुलसीपुर– १५ मलवारका २५ वर्षीय सुवाशचन्द्र चौधरीले धातुको कसौडीमा गाडेको अवस्थमा दुई सय वर्ष पुराना सिक्का फेला परेका थिए।
गाउँलेहरूले आपसमा रकम संकलन गरी मिलेर नयाँ बाटो खन्ने क्रममा स्थानीय शोभा भण्डारीको खेतमा गाडेको धन फेला परेको थियो।
कसौडीमा फेला पारेका पाँच सय ३७ थान चाँदीका प्राचीन सिक्कामध्ये ७६ वटा भारतीय सिक्का छन्।
ती सिक्का ब्रिटिस सरकारको पालामा सिक्काहरू हुन्। त्यस्तै, चार सय ६१ वटा श्री ३ लेखेका सिक्काहरू फेला परेका छन्।
जेसिबी चालकले गाडेको धन निकाल्ने क्रममा घटनास्थलमै खसेका श्री ३ लेखेका सात वटा सिक्काहरू जेसिबीका सहचालकले फेला पारेर आफ्नो घरमा लगेर राखेको अवस्थामा फेला पारिएको इलाका प्रहरी कार्यालय तुलसीपुरका प्रहरी निरीक्षक बखतबहादुर शाहीले सेतोपाटीलाई बताएका थिए।
चौधरीको जेसिबीभन्दा पछि-पछि बाटो खन्ने काम गरिरहेका सल्यान कपुरकोटका अर्का जेसिबी चालक राजन खड्काले गाडेको धन फेला परेको कुरा जग्गा धनी भण्डारीलाई भनेका थिए।
भएको सहमति अनुसार चौधरीले भागबन्डा नदिएपछि खड्काले गाडेको धन फेला परेको र त्यो सबै धन चौधरीले लगेर गएको कुरा गाउँलेलाई भनेका थिए।
घटना बुधबारको भए पनि सूचनाको आधामार पुगेको प्रहरीले चार दिनपछि शनिबार दिउँसो चौधरीको घरबाट ऐतिहासिक सिक्का बरामद गरेको थियो।
साथै, चौधरीलाई समेत पक्राउ गरी इलाका प्रहरी कार्यालय तुलसीपुरको थुनुवा कक्षमा राख्दै आइएको थियो।
बोलाएको समयमा उपस्थित हुने गरी चौधरीलाई आइतबार बेलुकी छोडिएको इप्रका तुलसीपुरका प्रहरी निरीक्षक शाहीले बताए।
फेला परेका सिक्का परीक्षणका लागि पुरातत्व विभागबाट कर्मचारी दाङ आउने भएका छन्।
